نورھان بیزنجو ءِ یات ءُ ازم ءِ درگت ءَ جوڑ کُتگیں تامر زوت شنگ بیت۔ راشد میانداد

الم بوانیت

دی بلوچستان پوسٹ

ٹی بی پی رسانکدر اھوالکار ءِ رد ءَ نمیرانیں نور ھان بیزنجو ءِ یات ءَ بلوچ ازمکارانی نیمگ ءَ یک تامربندی ءِ چِن ءُ لانچ کنگ بیتگ –

اے تامر نورھان بیزنجو ءِ یات ءُ ازم ءِ سر ءَ ازمکارانی نیمگ ءَ جوڑ کنگ بیتگ اَنت –

اے تامر ءِ سوجکار راشد میانداد اِنت، تامر تکسیر طاھر ءَ نبشتہ کرتگ ءُ تامر ءِ تہ ءَ شاہ ابن شین ءِ توار زورگ بیتگ –

تامرکار راشد میانداد ءَ ٹی بی پی ءِ اھوالکار ءَ گوں گپ کنان ءَ گْوشت کہ میوزک اسلام زیمر ءَ داتگ ءُ آئی ءَ گْوشت کہ میوزک ءِ تہ ءَ کمے کار پشکپتگ ءُ تامرکاری راشد میانداد ءُ عمر رحیم ءَ کرتگ اَنت ءُ توار گروکانی تہ ءَ اویس بلوچ بیتگ –

تامر ءِ تہ ءَ بازیں کارِستاں کار کرتگ ءُ اشانی تہ ءَ منیر مومن، رسول بکش پرید، مبارک قاضی، سبزل سامگی، شے حق نور ھان بیزنجو، اے آر داد، زبیر مکتار، ارشاد پرواز، زھور راج، یار جان بیزنجو کہ نورھان ءِ برات اِنت، دلجان بادشاہ ءُ عارف بلوچ ھوار اَنت –

آئی ءَ گْوشت کہ اے تامر ءِ چِن ءُ لانچ سال دوھزار ءُ ھژدہ ءَ بیتگ ءُ نِی وتی گڈی منزل ءَ سر بیتگ –

راشد میانداد ءَ گْوشت کہ اے تامر ءِ تہ ءَ نورھان بیزنجو ءِ ازم ءُ یات ءَ بیتگیں چیز ھوار اَنت –

آئی ءَ گْوشت کہ اے تامر بند نِی شنگ بیگ ءِ گُڈ سر ءَ سر بیتگ ءُ نوکیں سال ءِ بنداتی ماہ ءَ شنگ کنگ بیت اِنت ءُ تامر یک ادار ءُ بیست دمان ءِ تہ ءَ اِنت –

زانگ بہ بیت نور ھان بیزنجو بلوچستان ءَ نامی ئیں گشندھے ءِ دروشم ءَ زانگ بیت۔ آ سال دوھزار ءُ سَے ءَ پنچ اگست ءَ یک مراگشے ءَ پد بیران بیتگ اَت –

نوکتریں