بی ایس او ءِ بندری سیاسی مول ءُ مراد گھگیری اِنت – بشیر زیب بلوچ

بلوچستان ءَ راجداری ءِ بنکی تالان کنگ ءِ کرد ءِ پیلو کنوکیں نودربر گل بلوچ اسٹوڈنٹس آرگنائزیشن ءِ بنھِشت ءَ مروچی 53 سال سرجم بیتگ –

دی بلوچستان پوسٹ

دی بلوچستان چاگردی اھوالکار ءِ رد ءَ بلوچ اسٹوڈنٹس آرگنائزیشن آزاد ءِ گوستگیں سرکماش ءُ بلوچ لبریشن آرمی ءِ انیگیں سروک بشیر زیب بلوچ ءَ چاگردی رسانکجاہ ٹوئٹر ءَ بی ایس او ءِ 53 می سالروچ ءَ شتاشانی کرتگ ءُ وتی ھیال ءُ لیکہ درشان کنان ءَ گْوشتگ کہ بی ایس او ءِ چراگ ءُ بنکی راجداری ءِ راستی ءِ شوھاز ءُ راجی آجوئی ءِ جد ءُ جھد اِنت ۔

آئی ءَ گْوشت کہ جنگ ءُ راجی آجوئی ءِ جد ءُ جھد ابید ءِ بی ایس او یا کجام ھم این جی اوز ءَ ھچ دگری نیست ۔

بشیر زیب بلوچ ءَ گْوشت کہ بی ایس او ءِ باسک اے سدکی ءَ بہ دار اَنت ءُ بلوچ راجی زرمبشت ءِ آجوئی ءَ وتی سرجمیں کرد ءَ پیلو بہ کن اَنت ۔

زانگ بہ بیت بلوچ نودربر گل وتی بنداتی ءِ روچ ءَ بھر ءُ بانگی ءِ آماچ بیتگ اشی ءَ ابید ھم ورنایاں راجداری ءِ دارگ ءُ جنگی پگر ءِ برز کنگ ءَ بی ایس او ءَ ھروھد ءَ وتی جوانیں کرد پیلو کرتگ اَنت، ھمے جد ءُ جھد ءِ پشدر ءَ بی ایس او ءَ بندوکیں سدانی کچ ءَ ورناہ پاکستانی پوج ءِ دست ءَ کُشگ ءُ بازیں کچے ءَ بیگواہ کنگ بیتگ اَنت ۔

بی ایس او ءِ بازیں سروک پاکستانی پوج ءُ چیریں ادارھانی دست ءَ بیگواہ کنگ ءَ پد کُشگ بیتگ اَنت کہ اشانی تہ ءَ گلام مھمد بلوچ ءَ ھمید شاھین ھوار اَنت وھدیکہ اشانی ھوار ھوار بنجاھی سروک ھم بیگواہ اَنت کہ اشانی تہ ءَ ذاکر مجید بلوچ، زاھد بلوچ ءُ شبیر بلوچ ءَ ھوار دگہ ھوار اَنت ۔