نبشتانک: زِدّ ءُ کینگ ءِ آس جمبور اِنت
نبشتہ کار: ھمیدہ بلوچ
دی بلوچستان پوست
ما ھچبر سما نہ کنیں پہ اے زمین ءَ پہ اے چاگِرد ءُ دوداں پہ وتی مات ءُ گُھاراں ءُ پہ اے وتی تُنیگیں زمین ءَ، مئے رھبر ءُ رھشوناں وتی سر ءُ جان ندر کُتگ اَنت گار ءُ بیگواہ بوتگ اَنت زِندانانی آماچ بوتگ اَنت ءُ انگت ھزارانی کچ ءَ زندانی اَنت، مئے مات ءُ گُھار دَگانی سر ءَ گریوگ ءَ مجبور اَنت، ناں واب اِش ھست ءُ ناں کہ تاھیر ءُ نا زندمان ءِ دگہ لوٹ ءُ واھشتے دار اَنت۔ باریں چینچو ماتی تاسُپیں بچانی ژانگلویں جون دشت ءُ گیابان ءِ باھوٹ کنگ بوتگ اَنت۔ چنچو ماتانی کُٹ ھالی کنگ بوتگ، چنچو گْوھارانی سر ءِ ساھِگ کروجگ بوتگ اے ھیال مارا ھچبر نئیت بس ما مُدام وت ماں وت جیگ پہ جیگ اِیں یکے دومی ءِ گْورجیگ ءَ گِرگ ءَ اِیں۔
من وتی شھدربرجاہ ءَ کہ چاراں تاں گِنداں ھمک روچ نودربر نوکیں پندلے سازگ ءَ اَنت یک ءُ دومی ءِ سر ءَ دنتان دْرشگ ءَ اَنت سیاست بھر ءُ بانٹ کنگ بوگ ءَ اِنت بلوچ اکشن کمیٹی دو بھر ءَ جوڑ کنگ بوتگ زِدّ ءُ کینگ ءِ آس جمبور کنگ بوتگ یک ءُ دومی ءِ بد ءُ رد کنگ ءِ دود پد ءَ نوک گندگ ءَ کیت اِنت ماں چاگِردی رسانکدراں روچے نوکیں پندلے گندگ بیت روچے نوکیں گپے بُنگیج بیت من نہ گْوش آں چُشیں جیڑہ نہ بیت گَلانی تہ ءَ بلے اے جیڑھانی توجیلّ گیش ءُ گیوار ھما گَلانی تہ ءَ بیت ناں کہ یکے ءُ دومی ءِ گْورجیگ گِرگ ءَ جیڑہ گیشینگ بنت۔ بلے مئے نازانتی ءِ سبب ءَ ما وت ءَ چہ دژمن ءَ گیش وت تاوان دیگ ءَ ایں ءُ وتی واست ءَ گیشتر جیڑہ پیداک کنگ ءَ اِیں کہ اے جیڑہ دیمتر ءَ مزنیں تاوانے ءِ سوب جوڑ بوت کن اَنت۔
من سرپد باں کہ یک کارے وتی راج ءِ تاوان دیگ ءِ ھاتر ءَ کہ کنگ بہ بیت تاں آ کار ھچ پیم ءَ شَریں ءُ راستیں کار بوت نہ کنت، اگاں مئے منزل یک اِنت تاں اے کاروان ءِ پُرشگ ءَ تاوان اوں مئے وتی بیت۔ بلوچ گْوش اَنت کہ یک چمے درد کنت گُڑا دومی چم ءَ اوں تْور اِیت۔ اگاں تو وتی گَل ءِ گھتری ءِ واست ءَ شرگداری کنگ لوٹ ئے، گُڑا پہ ترا الم اِنت تو ھما گَل ءِ تہ ءَ بہ بو ءُ آئی ءَ گھتر کنگ ءِ کوشست ءَ بہ کن۔ اگاں تو بھر ءُ بانٹ کنگ ءَ چہ ھمے سرپد بہ ئے کہ تو آ گَل ءَ گھتر کنگ ءَ ئے گُڑا اے گپ تچک اِنت، کہ تو پہ کِست ءُ کینگ یا جِندی جیڑہ ءِ بُنیاد ءَ اے کار ءَ کَنگ ءَ ئے۔ منی ھیال ءَ زِدّ ءُ کینگ ءُ ھسد روچ پہ روچ مارا گیشتر گار ءُ برباد کنگ ءَ اَنت ءُ ما وت وتی دژمن ءَ وش کنگ ءَ اِیں۔ مئے دژمن لوٹ اِیت بلوچ وت ماں وت مُدام جیگ ماں جیگ بہ بنت بلے دژمن ءِ کار ءَ مرچی ما وت کنگ ءَ ایں بلے داں چُنت ءَ، مئے مات ءُ گْوھار مئے نازانتی ءَ کُتگیں کارانی سزاوار بہ بنت؟ –
دُگنیا مارا چارگ ءَ اِیں ءُ گندگ ءَ اِیں کہ ما وت ماں وت نہ سِل اِیں، گُڑا آ کُجام اُمیت ءَ پہ مارا، مئے سر ءَ بوؤکیں زلم ءِ ھلاپ ءَ گچے جن اَنت؟ اے کاراں کہ ما کنگ ءَ ایں ایشاں کَس راجکاری سرپد نہ بیت راجکاری ءُ راجدوستی اے نہ اِنت، آ کہ راجکار ءُ راجدوست اَنت گُڑا آ الم ءَ جیڑ اَنت کہ وتی راج ءَ ءُ وتی چاگِرد ءَ کُجام وڑ ءَ دیم ءَ بِہ بر اَنت، پہ وتی گُلزمین ءِ مھلوک ءَ چے پیم شَریں زندے بدئے اَنت۔ راجکار ءُ راجدوست مُدام پاک ءُ پلگار بنت شپ ءُ روچ کن اَنت، بے آرام ءُ بے تاھیر بنت وتی وھد ءَ گوں پندل سازی ءَ نہ گْوازین اَنت۔
سوبمندی بے زھمت کَشگ ءَ نہ بیت زھمت کَشگ لوٹ اِیت کار ءِ سر دارگ لوٹ اِیت اولی بر ءَ بے سوب بوت ئے وتی کار ءَ دومی بر ءَ گیش بہ کن اے رندی شَرتر بکن ئِے دانکہ وت ءَ سوبمند کُت بہ کن ئے راجکاری ءُ راجدوستی ءِ گپ ءَ کن ئے گُڑا ترا نزور ءُ ناسرپد وتی بڈ ءَ بندگ لوٹ اَنت، دست ءَ گِرگ لوٹ اَنت تبک پہ تبک ءَ دیم ءَ برگ لوٹ اَنت ۔
نودربر راج ءُ چاگِردانی چم بنت راجاں دیم ءَ بر اَنت راجانی دست ءَ گِر اَنت ناسرپداں سرپد کن اَنت بلے مئے نودربر وت ماں وت جیگ ماں جیگ اَنت۔
دستبندی کناں کہ نوں بس کن اِت یکجاہ ءُ یکمُشت بہ اِت، کسان کسانیں جیڑھاں زور مزن مہ کن اِت کہ تاوان مئے وتی اِنت۔
“مُدام وش ءُ سلامت بات اِت سکی ءُ سوری مہ گندات اِت”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔