پنجگور ءَ نشہ باپاری ءِ بنجل ءِ سر ءَ اُرش، اُرش ءِ زمّہ واری بی آر اے ءَ منّ اِتگ

دی بلوچستان پوسٹ

راج ءِ لوٹانی رِد ءَ نشہ باپاریانی بگیری ءَ کاروائی کنگ ءِ بندات کُرتگ، نشہ ءِ بنجل بند کنگ نہ بوت اَنت، باپاری کنوک تچکی ءَ نشانگ کنگ بنت – بیبگر بلوچ

ٹی بی پی پتر ءَ سربوتگیں ھالانی رِد مروچی سھب ءَ پنجگور ءِ دمگ خدابادان سراوان ءَ ناشُناسیں سلاہ بندیں پرپٹ سواراں نشہ باپاری کنوکیں شبیر نامی ئیں مردمے ءِ بنجل ءِ سر ءَ دز بمب اُرش ءِ کُتگ – اُرش ءِ آسر ءَ ھچ وڑیں جانی تاوان ءِ ھال نہ بیتگ –

دمگی اھوالکارانی رِد ءَ پنجگور ءِ تہ ءَ اے نشہ باپاری ءِ درساں مستریں بنجل انت کہ اود ءَ ھر وڑیں مزن کسانیں نشہ بھا بیت ءُ چہ دوراں مردم نشہ ءِ زورگ ءَ کائنت –

دومی نیمگ ءَ بلوچ آجوئی لوٹوکیں گل بلوچ ریپبلکن آرمی ءِ جارکش بیبگر بلوچ ءَ رسانکدراں اے اُرش ءِ زمّہ واری منّ اِتگ ءُ گوشتگ کہ مروچی سھب ءَ شبیر نامی ئیں نشہ باپاری کنوکیں بنجل ءِ سر ء دزبمب اُرش ءِ کُتگ، اے اُرش پنجگور ءَ ھوار مکران ءِ ایندگے دمگاں نشہ باپاریانی ھاتر ءَ یک بیھارے ، پرچا کہ گیشتر نشہ باپاری کنوک ریاست ءِ سرپرستی ءُ دمگی پولیس ءِ ملام دئیگ ءَ نشہ ءِ باپاری ءُ بلوچ چاگرد ءِ تہ ءَ زھر تالان کنگ ءَ انت –

جارکش ءَ گوشتگ کہ نشہ ءِ بگیری ءَ بلوچ راج گوستگیں بازیں ماھاں چہ زھرشانی کنگ ءَ اِنت بلے ریاستی پولیس ءُ ادارہ وتی داشتگیں مردمانی بگیری ءَ گامگیج نہ زورگ ءَ انت – گل ءَ راجی لوٹانی رِد ءَ نشہ باپاری کنوکانی بگیری ءَ سلاہ بندیں کاروائیانی کنگ بندات کُرتگ ـ ما تچکی ءَ اے جار ءَ پرینیں کہ اگاں نشہ باپاری کنوکاں شھرانی تہ ءَ نشھی بنجل بند نہ کُرتاں گڑا آ تچکی ءَ نشانگ کنگ بنت –

جارکش ءَ گوشتگ کہ اگاں نشہ باپاری کنوکانی بگیری ءَ مئے کاروائیانی میان ءَ دمگی پولیس ءَ مئے سرمچارانی راہ دارگ ءِ جھد کُرت یا تاوان داتاں گڑا ما پولیس ءَ تچکی ءَ آھانی کمکار سرپد بہ ایں ءُ آھانی سر ءَ پسوئی اُرش ءَ کنگ ءَ چک ءُ پد نہ بہ ایں –