دی بلوچستان پوسٹ
ٹی بی پی پتر ءَ سربوتگیں ھالانی رِد ءَ گوستگیں روچ ءَ پاکستانی پوج ءَ کیچ ءِ دمگ بلیدہ ءَ سَے ورناہ آوار جتگ ءُ بیگواہ کُتگ کہ آھانی تھا مروچی یک ورنایے لٹانی چیر ءَ بیران بیتگ ءُ آئی ءِ لَٹ ءُ کُٹ کرتگیں جون ویرانگاں دزکپتگ –
بیران بیتگیں ورنایے پجار رحیم داد ء داد بخش ءِ نام ءَ چہ بوتگ کہ گوستگین روچ ءَ پاکستانی پوج ءَ چہ بلیدہ ءَ گوں دگہ دو ھمراھانی ھواری ءَ آوار جتگ ءُ وتی پوجی بنجل ءَ برتگ – ھمودا چہ بازیں لٹ ءُ کُٹ کنگ ءِ سوب ءَ ورنا بیران بوتگ ءُ آئی ءِ زانگولیں جون مروچی جنگل ءَ دور دیگ بوتگ ـ
ھندی مردمانی رِد ءَ ورنا دھکاں کارے بوتگ ـ
زانگ بہ بیت چد ءَ پیش ھم بازیں ورنایے پاکستانی پوج ءَ گپتگ ءُ وتی لَٹ ءُ کُٹی زنداناں بُرتگ ءُ اود ءَ بازیں لٹ ءُ کُٹانی سوب ءَ بازیں ورنایے بیران بیتگ اَنت ءُ پد ءَ آھانی جون ماں جنگل ءُ ویرانگان دور دیگ بوتگ انت ـ
سیاسی ءُ چاگری مردمانی گوشگ اِنت کہ بلوچستان ءَ پاکستانی پوج انسانی ھکاں لگتمال کنگ اِنت بلے جھانی انسانی ھکانی گل بلوچستان ءَ تنی وھدی بے دلگوش اَنت –