نبشتانک: آزمُودگ
نبشتہ کار: عمر مراد
دی بلوچستان پوسٹ
دُرستاں چہ پیسر وت ءَ را چہ سیاست ءَ مھزب ءَ چہ ھر گروپ ءُ گل ءَ پہ یک ساھتے در بہ کن ءُ نوں اے نبشتانک ءَ بوان چریشی نبشتہ کنگ ءَ نہ مئے جنجال گیشتر بنت نہ کمتر بنت تو ئے وانوک پہ ایمانداری ایشی ءَ بہ وان پہ ایمانداری وتی پسو ءَ کمنٹ ءَ سر ءُ سوج ءَ بہ دے ۔
من نہ تاریک بلدیاں نہ سیاست دانے آں بس من وتی نیّت ءَ کہ ھر شیرے نبشتانکے نویساں منی جُھد گیش ءَ چہ گیش ھمیش انت کہ اچ منی دانکاں منی راج ءُ سرزمین ءَ تاوانے مہ رس اِیت اگاں پائدگے رست نہ کنت۔
نوں من کایاں وتی اسل مول ءُ مُراد ءِ نیمگ ءَ اد ءَ من ھما چیزاں نبشتہ کناں کہ من چم ء وت دیستگ اَنت اے نبشتانک ءَ من نہ کسے ءِ ھک ءَ گپ جناں نہ ایر جنگ ءَ ما 20 بیست سال انت کہ دوزھیں زندے ءِ آماچ ایں ،مئے ھزاراں مردُم شید بوتگ ،ھزاراں انچو گار ءُ بیگواھ اَنت کہ اے بیگواھی جیل ءُ زندانے نہ انت، زندان ءَ گوں مردُماں گند ءُ نند بوت کنت زندان ءَ ھما بندیگ یا آئی ءِ کھول ءِ مردم زان انت کہ مئے مردم کُجا بند انت ، آئی ءِ سزا چُنت سال انت، آئی ءَ وکیل ءُ آمیدگس ءِ ھک بیت بلے گوما چو نہ انت، مئے مردم بس گار بنت آئی ءِ کھول ءِ مردم چہ گم ءُ اندوھاں نیم زند ءُ نیم گنوک انت، اے گار بوگ ءِ مئے ورنایاں بہ گر ماس پس زھگ ھم ھوار انت ، نوں گیرت ءِ ازت ءِ گناہ ءِ بے گناھی ءِ ھیال ءِ دارگ اھمکی یے ، پیسری گپ بہ بنت یا انوں ملکناز ءُ کُلسوم ءِ اندوناکیں داستان ما بس کُشگ بوگ ءَ انت بیگواہ کنگ بوگ ءَ اِنت ، لڈّینگ ءُ گلینگ بوگ ءَ اِنت ، ھچ بلوچ پشت نہ کپتگ اے آس ءَ ، اے راستے کہ اے درد ءُ دوزہ ءَ مارا مئے دُژمن دیگ ءَ انت
بلے سنہ 2000 ء سال ءَ تاں انوں 2020ء ءَ بیا ما بس یکیں کار ءَ یکیں گپ ءَ کنگ ءَ اِیں، آکر پرچا مئے توک ءَ بدلی شرتِری نئیت دژمن بیست سال ءَ 100بدلی کار اِیت ھزار دروشم مٹّا اِیت نوں ما ھرلوگ ءَ یک براتے آجوئی جُنز ءِ لٹّ ءَ ورگ ءَ ایں، یکے سرکار ءِ پرچا؟
اے واستا کہ جُنز ءِ بنداتی روچاں آجوئی پسُندیں پارٹی ءُ گلاں پاکستانی پارلیمنٹ سیاستدانان ءَ ھنچو ایر جت ھنچو کنڈُم کُرت کہ ھپتمی ھشتُمی تبک ءِ کلاس ءِ وانندگ ھنچو جزباتی کُرت انت، کہ آیاں وتی میتگانی توک ءَ وتی مستریں برات ءُ کماش ھمُک دیوان ءَ گدار، دلّار دُژمن ءِ سَنّد ءُ سرٹیپکٹ دات انت چہ آجوئی پسُندیں گَلانی مرکزی بیاناں ھم پارلیمانی رھبر پھک ءَ شُشت انت اے وھداں پارلیمانی سیاستداناں چُشیں باز رھشون ھست ات ، کہ آیاں بلوچ ءِ درد پِر ات بلے مئے گیچن ءَ سرجم ءَ گیتک انت پرایاں چُشیں راھے پشت نہ گیتک کہ باندا مئے ھمراہ بوگ ہ لوٹ انت، ھمراہ بوت بہ کن انت یاکہ ھمود ءِ پہ بندیگاں جُھدے بہ کن انت ، مئے ھک ءَ گپے بہ جن انت، بازیں مردمے دلّای ءِ نام ءَ آوار جنگ، کُشگ، بے ازت کنگ ہم بوت ءُ چد ءُ ھراب ءُ گندگتِریں کار ھم کنگ بوت، سنگتے پہ گَل ءَ کار بہ کنت دگے ھر ھرابی یے کنت بہ کنت گِر ءُ دار نیست ، راستیں جیڑھانی سر ءَ جُست کنوک دم بُرتگ ءِ نام دیگ بوت، یکے اگاں درمُلک ءَ وتی ناکو ءُ براسے ءَ بُرت آ ھم لگور گُشگ بوت یا کہ یکے چہ درمُلک ءَ گپے جنت آ پارٹی سپیری ءِ شگان جنگ بوت ایشاں چہ ابید ھم دگہ انچیں ردی ءُ ھرابی ھست کہ من پہ زانت بیان اش ھم نہ کناں اے بس کسانُکیں مسال انت۔
چہ بولان ءَ بگر تاں مند ءَ ھر دُز ءُ ڈُنگے ھست اَت آیاں سرمچاری پوشاک گور ءَ کُرت 2013ء پد رُمب رمب ءَ ڈیتھ اسکواڑ جوڑ بوت انت۔
پارلیمانی سیاستداناں بندات ءَ چار اِت کہ انوں مئے سوب انت، ما گُش اِیں واجہ تو مارا گُور ءُ ھیر بہ کن سیِٹ ءُ وزیری بہ دے ماکوہ ءِ ورنایاں ایر گیج اِیں، اے چار چُوری انت، مزاکرات ءُ گپ ءُ تران کن اِیں ءُ پوج ءِ چیر ءَ پُترت انت، چہ سرمچاراں ھم آیانی جاناں ھتر ءَ ھست ات ، ھر یکے ءَ چہ دومی ءَ گیشتر پوج ءِ کر ءَ چاپلوسی کُت سرمچارانی ھلاس کنگ ءِ ناکامیں جُھدے کُت بلے اے ھم بزّگ بے سوب بوت انت، نوں اشانی جاگہ ھما ڈُنگاں گپتگ ڈنگانی اِزّت گیشتر اِنت، ڈُنگ پہ سرکار ءَ جوانیں وڑے ءَ کار کنگ ءَ اَنت ھروچ سد آوار جن انت سد کُش انت وتی مات ءُ گُھارانی لجّ ءُ گیرت ءَ پاد مال کنان انت بلے اے دُز ءُ ڈنگ ھم بلوچ انت، مئے برات انت دُژمن ءَ مئے سر ءَ مُشتگ اَنت، نوں گوں ایشاں نہ پارلیمانی رھبرانی دست روت نہ آزاتی پسُندانی لس مھلوک بزّگ و ھرکس زانت تاکت ءِ گلام انت ءُ بے دس رس اِنت ۔
نوں باید اِنت پارلیمانی لیڈر ھم ایماندار بہ بنت ھر جاہ ءُ ھر وھد ءَ مُلک ءَ در مُلک ءَ پہ وتی راج ءُ زمین ءِ ھاتر ءَ جُھد بہ کن انت وتی کَش گور ءِ ڈُنگاں سرپد کنگ یا لگام دیگ ءِ جُھد ءَ بہ کن انت ، سرکار ءِ ھر اَمل ءُ کارے کہ پہ راج ءُ زمین ءَ تاوان انت، آئی ءَ ایر بہ جن انت ۔
ءُ آزاتی پسُندیں سلاہ بندیں گَل ءُ پارٹی پارلیمانی سیاستدانی لس ماپی ءُ بکشگ ءِ جار ءَ بہ جن انت ءُ ھر ڈُنگ ءُ دُزّے کہ ماپی لوٹ ایت بلوچی دودمانانی پادمالی نہ کنگ ءِ سوگند ءَ وارت ھم آ ماپ کنگ بہ بیت ،چے ءَ کہ مئے دُژمن ءِ لوٹ ھمیش انت کہ بلوچ ءَ بلوچ ءِ دست ءَ بُہ کوشارین اِیت ۔
اگاں اے وڑ کنگ بہ بیت بلوچ ءِ مُشکل ءُ جنجال کمتر بوت کن انت، اے نبشتانک یکبرے بلکیں شُمارا بہ تورین اِیت بلے کم کم ءَ شما منی گپانی سر ءَ تپاک کن ات ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت