سرکاری ھمسنتی ءَ چہ جتائی ءَ بی این پی ءِ مُز ؟
ٹی بی پی شونگال
بلوچستان ءُ پاکستان ءِ نیام ءَ ھپتاد سالانی تہ ءَ “زوریں سیادی” رد دیگ ءُ قولانی پروشگ ءِ گوستانک سک دراج اِنت ۔ اِشی ءِ بندات خان قلات ءِ برات شھزادگ عبدالکریم ءَ روان کنت ءُ نواب نوروز خان زھری ءِ دزگیری ءَ سر بیت، ءُ پد ءَ گُڈسر ءَ نواب اکبر خان بگٹی ءِ نمیرانی ھم ردیگانی بھر اِنت۔ قولانی پروشگ ءِ یکشلی ءَ برجاہ داران ءَ، گندگ ءَ انچو زانگ بیت کہ بنجاھی سرکار ءُ بی این پی مینگل ءِ نیام ءَ 2018 ءَ بیتگیں شش ٹِکی کرار بنجاہ (وفاق) ءَ دلگوش گور کنگ ءَ چہ مکن کُتگ اَنت ۔
بنداتی وھد ءَ اے کرار پہ بی این پی ءِ ھاتر ءَ دوئیں نیمگاں چہ یک سوبے ءِ دروشم ءَ چارگ بیگ ءَ اَت، یک نیمگیں بنجاہ (وفاق) ءَ وتی چاریں ووٹاں گوں تھریک انساپ ءِ سرکار ءَ کمک کنگ ءِ سوب ءَ اسٹیبلیشمنٹ ءِ چماں آیانی ھاتر ءَ کمے جاہ اڈ شرپداری ءِ منّگ بیتگ اَنت ءُ دومی نیمگ ءَ بیگواھیں بلوچانی جیڑہ کرار ءِ تہ ءَ ءُ پارلیمنٹ ءَ چِست کنگ ءِ سر ءَ آیاں بلوچ راجدوستیں مردمانی کِر ءَ ھم ارزشت رسگ ءَ اَت۔ اڈ بیتگیں کرار ءِ دُرستاں ارزشت داروکیں ٹِک بیگواھیں بلوچانی آجوئی بیتگ، کہ چہ (وفاق) بنجاہ ءِ نیمگ ءَ ھچ وڑ ءَ وتی کول پیلو کنگ نہ بیگ ءِ سوب ءَ بلوچستان نیشنل پارٹی ءَ سرکاری ھمسنتی ءَ چہ گستائی ءِ پیسلہ کُت۔
بازیں زانتکارانی رد ءَ اے کرار نامگ ءَ ھر وڑ ءَ بے سوب بیگی اَت، بلے ھمے وھد ءَ کہ 417 بیگواھیں بلوچ کہ آجوہ بیتگ اَنت، اشانی یل بیگ ءِ پاگ بی این پی ءُ اختر مینگل ءِ سر ءَ بیت۔ بلے اختر مینگل ءَ وت 17 جون ءَ اسمبلی ءَ وتی تران ءِ تہ ءَ اے گپ من اِت کہ 2018 ءَ بیتگیں آھانی کرار ءِ پد تھریک انساپ ءِ سرکار ءِ تہ ءَ دگہ 1500 بلوچ بیگواہ کنگ بیتگ اَنت۔ داں اے وھد ءَ بلوچستان ءَ بیوکیں زوریں بیگواھیانی دارگ ءِ بے سوبی ءِ زمہ واری ءَ کس ھم وتی سر ءَ زیرگ ءَ ساڑی نہ اِنت۔
ھیر، لس بلوچانی ھمدلی ءُ اپوزیشن ءِ ھمراھی ءَ چارگ بہ بیت گُڑا بی این پی ءِ سرکار ءَ چہ ھمسنتی ءِ ھلاسی پیسلہ سک جوانیں وھدے ءَ کُتگ ۔ سرجمیں بلوچستان ءَ پاکستانی اسٹبلشمنٹ ءِ زوراکی ءِ پالیسیانی ھلاپ ءَ بژن ءُ زھر ءِ یک نوکیں دروشم ءِ گندگ ءَ پیداک اِنت۔ گمانی وڑ ءَ پوج ءِ اڈداتگیں “ڈیتھ اسکواڈانی” ھلاپ ءَ یکشل ءَ برجاھیں زھرشانی نی چارمی ھپتگ ءَ سر بیتگ اَنت۔ گوستگیں ھپتگ ءَ کیچ ءَ دگہ یک بلوچ زالبولے کلثوم بلوچ ءِ ھندی ڈیتھ اسکواڈانی دست ءَ نمیرانی ءَ آس ءِ سرا تیل ریچگ ءِ کار کُتگ۔ بلوچستان ءَ سیاسی زانت ءِ یک نوکیں بندات ءِ گندگ بیت کنت ۔
اسمبلی ءَ وتی تران ءِ نیام ءَ اختر مینگل ءَ بلوچستان ءَ پد ءَ ڈیتھ اسکواڈانی زندگ کنگ ءِ سر ءَ وتی تُرس درشان کُت اَنت۔ ڈیتھ اسکواڈ ھما سلاہ بندیں ٹولی اَنت کہ آیاں گمانی وڑ ءَ پاکستانی پوج بلوچ راجدوستانی ھلاپ ءَ کارمرز کنت۔
اے ڈیتھ اسکواڈ نہ تھنا لس بلوچانی زند ءَ کریاب کنگ ءِ سوب ءَ اَنت بلکیں چہ ایشاں اختر مینگل ءِ جند ھم سان مند بیگ ءَ اِنت۔ نام کپتگیں ڈیتھ اسکواڈءِ مستر ءُ اختر مینگل ءِ ھندی ءُ ٹکی ایرادار شفیق مینگل یک برے پد ءَ دیما آرگ بیگ ءَ اِنت۔ نی شفیق مینگل سر زائری ءَ اختر مینگل ءِ بُنکی دمگ خضدار ءَ ایراداری کنگ ءَ اِنت، آئی ءِ ھلاپ ءَ روانک ءُ جلوس کشگ ءَ اِنت، بلے اے رند ءَ شفیق مینگل سلاہ بندیں دروشم ءَ نہ بلکیں سیاسی دروشم ءَ دیما آرگ بیتگ ءُ آ جھلاوان عوامی پینل (جاپ) ءِ نام ءَ باقائدہ سیاسی کارانی تہ ءَ دلگوش اِنت۔ یات بہ بیت چہ ایشی ءَ پیسر، شفیق مینگل ءِ سر ءَتوتک ءَ چہ دزکپتگیں یکجاھیں گورانی ءُ راجدوستیں سیاسی جھدکارانی نشانگ کنگ ءُ کُشگ ءُ بیگواہ کنگ ءِ بھتام جنگ بیتگ اَنت –