وائس فار بلوچ مسنگ پرسنز ءِ زھرشانی بنجل برجاہ

شال ءَ وائس فار بلوچ مسنگ پرسنز ءِ زھرشانی بنجل برجاہ –

دی بلوچستان پوسٹ

زھرشانی بنجل ءَ چاکردی ءُ سیاسی باسک، سوشل ایکٹوسٹاں ھوار لس مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدری درشانیتگ –

وائس فار بلوچ مسنگ پرسنز ءِ کسان کمک سرکماش ماما قدہر بلوچ ءَ بنجل ءَ اتکگیں مردمانی گون ءَ گپ کنان ءَ گْوشت کہ ریاست ءِ پاکستان وڑ ءُ وڑیں ھنر ءُ پندلاں بلوچاں بیگواہ کنگ اِنت کہ کمے ءَ یلہ کنگ ءُ دوسری ءَ بیگواہ کنگ اِنت ءُ ایشی ءِ سوب مستریں ھما توار ءِ جھل کنگ اِنت – ماما قدیر بلوچ ءَ گْوشت کہ زاکر مجید ءَ مروچی یازدہ سال اِنت کہ ریاستی زندانانی تہ ءُ بندیگ اِنت –

آئی ءَ گْوشت کہ اے یازدیں سالانی تہ ءَ زاکر مجید ءِ مات ءَ وڑ وڑیں گم ءُ سکیں دوچاری کرتگ ءُ انگت ءَ کنگ ءَ اِنت –

ماما قدیر بلوچ ءَ گْوشت کہ زاکر مجید ءِ مات ءَ ھوار ھر ھما مات کہ آئی ءِ زھگ گار ءُ بیگواہ اِنت آئی ءِ روچ گم ءُ پریشانی تہ ءُ گوزگ ءَ اَنت- آئی ءَ گْوشت کہ ریاست چندے مردم یلہ کنت ءُ چندے ماتانی دل ءُ وشنود کنت بلے ایشی ءِ پشدر ءَ دگہ گیشتر مردم آوار جنت ءُ بیگواہ کنت –

بیگواھیں مردمانی درگیجگ ءَ زھرشانی بنجل ءَ سَے ھزار ءُ نُھ سد ءُ ھشتاد ءُ دو روچ سرجم بیتگ ءُ آئی ءَ گْوشت کہ زھرشانی بنجل یک بندیگے ءِ ودار ءَ ھم نندیت –

زانگ بہ بیت ھشت جون بی ایس او ازات ءِ نیمگ ءَ گار ءُ بیگواھیں مردمانی روچ ءِ درگت ءَ نامینتگ ءُ شال ءِ پریس کلب ءِ دیم ءَ زھرشانی کنگ بیت ءُ چاگردی رسانکجاہ ءَ کمپئنے ءِ جار ھم پرینگ بیتگ