ڈنک ویل ءِ ھلاپ ءَ بیوکیں زھرشانی روانک گوادر ءِ جتائیں دگانی سر ءَ گشت کنان ءَ پریس کلب ءَ سربیتگ کہ اود ءَ رھشوناں تران کُتگ ۔
گوستگیں روچاں کیچ ءِ مزن شھر تُربت ءَ یک لوگے ءَ دُزی ءِ نیام ءَ یک جنین آدمے ءِ کوش ءُ تپلیں جنکو ءِ ٹپی بیگ ءِ ویل ءِ ھلاپ ءَ گوادر ءَ زھرشانی کنگ بیتگ ۔
زھرشانی ءَ گوں ھسین واڈیلہ، زپر ایسا آزاد ءُ شاہ داد شاہ ءَ تران کنان ءَ گوشت کہ ڈنک ءَ دُزانی دستءَ جنگ بیتگیں جنین نہ تھنا برمش ءِ مات اِنت بلکیں مئے درستانی مات اِنت، پمیشکا مئے درستانی زمہ واری جوڑ بیت کہ اے ویل ءِ ھلاپ ءَ توار چِست بہ کنیں۔
آیاں گوشت کہ ڈنک ءَ دُزی ءَ ھواریں سلکارانی درگت ءَ سرجمیں بلوچستان زانت کہ اے سلاہ بندیں مردمانی سر ءَ کئی دست اِنت۔
آیاں لوٹ کُتگ کہ ویل ءَ ھواریں مستریں سلکار سمیر سبزل ءَ ھوار دزگیر کُتگیں مردماں تُربت ءَ چار راہ ءِ سر ءَ پاھو دیگ ءُ پہ دگراں ابرت جوڑ کنگ بہ بیت۔
زھرشانی ءَ تران کنان ءَ گوشت لس مردماں ناکُن چِنے کیسگ ءَ کنگ ءُ گردگ ءِ ھک نیست بلے سلاہ بندیں سلکار سر زاھر ءَ کئی رزا ءَ گوں توپنگاں گوں چکرگ ءَ اَنت۔
ھمے درگت ءَ وی بی ایم پی ءِ رھشون ماما کدیر ءَ چاگردی رسانکدر ءِ تندجاہ ٹوئٹر ءَ یک تامرے ٹوئٹ کنان ءَ گوشت کہ من گوادر ءِ سنگتانی منتواراں کہ آیاں ڈنک ءِ ویل ءِ ھلاپ ءَ زھرشانی کُتگ۔
آیاں گوشت کہ درست زان اَنت ڈیتھ اسکواڈاں پوج ءِ کمک گون اِنت ءُ اے مردم بلوچ پسگانی بیگواھی ءُ آپریشنانی تھءَ پوج ءِ ھمراہ اَنت ۔
ماما کدیر ءَ وتی ٹوئیٹ ءِ گُڈسر ءَ گُشت کہ بلوچانی زوریں بیگواھی ءِ تھءَ ھواریں پوج ءُ ڈیتھ سکواڈانی ھلاپ ءَ سرجمیں پاکستان ءِ تھءَ پر ایمنیں زھرشانی کنگ بہ بیت۔
دومی نیمگ چاگردی رسانکدر ٹوئیٹر ءَ ھم بلوچ سیاسی ءُ چاگردی جھدکار ڈنک ویل ءِ ھلاپ ءَ برمش بلوچ ءَ انساپ دیگ ءِ ھاتر ءَ کمپین کنگ ءَ اَنت ءُ #JusticeForBramsh ءِ ھیشٹیگ ءَ کارمرز کنان ءُ ٹوئٹ کنگ ءَ اَنت۔