نبشتانک: سنگت شاری ءَ کینسر انت
نبشتہ کار: شپانک بلوچ
اولی بھر
دی بلوچستان پوسٹ
دیر اِنت دل گُش اِیت وتی دل ءِ مارشتاں تالاں کن کہ کسے منی زند ءِ باوستاں سرپد بہ بیت منی شپ گوں اندوهاں روچ گوں گّژنگی ءَ گْوازان انت کاروان راهی اِنت دیم پہ منزل ءَ روان انت،
من ءَ گوں وتی سنگت ءَ باز مهر ھَست ءَ منی زند ءُ روچ ءِ بندات گوں سنگت ءِ بچکندگ ءَ بیت منی ءُ آئی سنگتی چو جان ءُ ساہ ءِ وڑ ءَ اَت اَنچوش کہ جان اَبید ساہ ءَ تھنا کُنٹ بیت ءُ ساہ اَبید جان ءَ نہ مان ایت منی سنگت ءَ گُهارُکے هستگ اَت نام ئِے شاری اَت.
من ءُ منی سنگت وهدے لوگ ءَ اتکگ ایں شاری پیسر ءَ سرپد بوتگ کہ مرچی منی لالا پیداک اَنت داں مئے ودار ءَ راہ سر ءَ نیشتگ ما اولی بَراں گوں کاروان ءِ همراهی ءَ رپتگ اَت ایں شاری کسان اَت شاری من ءَ ھَنچو دوست اَت چو جند ءِ گُھار ءِ وڑ ءَ.
منی سنگت پہ وانگ ءُ زانگ ءِ ھاتر ءَ شال ءَ شتگ اَت من ایوک اَت آں شش ماه ءِ سر ءَ اتک آں شاری ءِ چارگ ءَ دل ءَ لوٹ ات کہ ھمک روچ بیا آں گوں شاری ءَ لیب ءُ مسکرا بہ کن آں بلے موکل نہ رس ات کہ بیا آں
شش ماه ءَ رند من اتک آں شاری دانتاں پروشتگ اَت دپ ئِے چُر اَت من اتک آں آ پیسر ءَ سرپد ات کہ مرچی منی یک لالا یے کیت
پیر زال من جست کت”
اما بِچار من هال هم ندیاں کا آں انگت شاری سرپد بیت کہ لالا پیداک انت”؟
پیر زال سِچکان ءِ پیچگ ءَ اَت کند ایت ءُ گُشت ئِے “مدام شمے نام ءَ گپت نازینک جنت بازار ءِ چُکانی گور ءَ نہ روت بس یکوی بچکندیت ءُ گُش ایت منی لالا کا اَنت پہ من چُوڑی کار اَنت پہ من نوکیں پچ کار اَنت من نہ رواں لیب ءَ کہ بَلّی تو منی چوڑیاں زور ئے “.
من کند ات ءُ ھمے وھد ءَ شاری اتک منی سر ءِ پاگ پچ کت سرین ءِ بند بوج ات آں ءُ همے گشت ئِے”لالا تو چو چی ءَ رنج اِتگ ئے، چُنت وهد اِنت تو نیاتکگ ئے کجا بوتگ ئے،کمبر جان وانگ جاه ءَ شتگ تو ھم منی چارگ ءَ نیائے پرچا من کمبر ءَ هال دیاں کہ لالا منی چارگ ءَ نئیت”.
من کند اِت ءُ گشت” شاری منی ارواہ منی گُھار من ءَ بے تو یک ساهتے وش نہ بیت بلے وهد ءُ کاراں گوں گیش ءُ گیوار نہ باں پمیشکا زوت زوت آیگ نہ بیت کولیگاں دلگران مَبو، کمبر جان ءِ هال ءَ بدے هال اهوال کنت”؟
شاری ءَ گشت” هو دوشی ماتی ماهتون ءِ لوگ ءَ گوانکوے کتگ ئِے ءُ درستاں پہ سلام ءِ راهیگ کتگ ئِے”.
من پسو دات” والیکم سلام سلامت بات”.
شاری جان تو بیا منی(پچّاں) بیار من جو ءَ رواں جانے شوداں کاہ آں،
شاری، سبر لالا من تئی پُچاں کَش آں گڑا من تو رَویں جو ءِ سر ءَ ترا….. آپ پِریچاں من زان آں دو ماه بیت تو جان نہ شُشتگ، هاهاها
من کند ات…. هاهاها هو من ءَ دو ماه بیت جان نہ شُشتگ پرچاکہ پہ جان ءِ شودگ ءَ آپ نہ رس اتگ شاری جان.
روان انت…
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔