بلوچستان: سِی ءُ سَے مردم کورونا ویروس ءَ گورجتگ

دی بلوچستان پوسٹ

گوستگیں بیست ءُ چار ادار ءَ سِی ءُ سَے مردم کورونا ویروس ءِ نادراھی ءَ گورجتگ اَنت نادراھانی کَچ نوزدہ سد ءُ نُھ ءَ سر بیتگ –

شال ءَ یک پریس کانپرنسی دیوانے ءَ گپ کنان ءَ بلوچستان ءِ سرکار ءِ جارکش لیاکت شاھوانی ءَ گْوشت کہ بلوچستان ءِ چاردہ جتائیں ھنداں نُھ سد ءُ شست ءُ سَے کورونا ءَ گورجتگیں بندی نپاداں واپینتگ اَنت –

آئی ءِ گوشگ اِنت کہ لوگانی تہ ءَ بندی کرتگیں مردمانی کچ پانزدہ سد اِنت

جارکش لیاکت شاھوانی ءَ جار پرینتگ کہ باندات ءَ بلوچستان ءِ سرجمیں باپاری سھب ءِ ادار سَے ءَ بہ گر داں ادار پنچ ءَ پچ کنگ بنت –

شال ءَ گپ کنان ءَ آئی ءَ گْوشت کہ بلوچستان ءَ یک ءُ نیم ماہ ءَ بند آری ءَ کنگ ءَ پد کم کنگ بیتگ –

آئی ءَ گْوشت کہ بلوچستان ءِ سرکار سَے مسامانی سر ءَ چاری کنت کہ بند آری ءَ کم کنت ءُ وھدیکہ ڈاکراں اے گوشتگ کہ بند آری گیش کنگ بہ بیت بلوچستان ءَ بند آری ءِ سبب ءخ باپاری مردم بے کساس تکانسر بیتگ اَنت ءُ سیزدہ لَک مردمانی والینگ نہ بیت –

لیاکت شاھوانی ءِ گوشگ اِنت سروزیر امران ھان ءِ گوشگ ءَ بندآری ترند کرتگ-

بندآری ءَ مان نیارگ ءَ باپاری ءُ مھلوک ءَ کمک نہ کرتگ ءُ چریشی ءِ سبب ءَ مانیاروکیں بیست ءُ ھپت ھزار دکان بند کنگ بیتگ اَنت –

جارکش ءَ گْوشت کہ انجمن تاجراں ترندیں بندآری ءِ وھد ءَ دپ بند ءُ اژدری سوجانی منگ ءِ زبان داتگ اگاں آ وتی زبان ءَ سرجم کرت کن آں گڑا بازار پد ءَ رژناہ دامیں رنگاں پچ کنگ بنت –