دی بلوچستان پوسٹ رسانکدار ءِ تھ ءَ دیمروی
ٹی بی پی شونگال
11 اگست 2017 ءَ دی بلوچستان پوسٹ ءَ وتی بن ھشت ءِ ایر کنگ ءِ پجیگ ءَ گل ءِ دلجمیں “ وڑ ءُپیم، مول ءُ کار ءِ رھبند” شنگ کُتگ اَت۔ شنگ کُتگیں رھبند ءِ اولی ٹِک ءِ تھ ءَ اے واھگ دارگ بیتگ اَت کہ گل ءَ دیمروی ءِ نیمگ ءَ گامزن کنان ءَ “دی بلوچستان پوسٹ چار جتائیں زبانانی تھ ءَ چار جتائیں تندجاھاں چہ شنگ کنگ بیت۔” ھمے ھاتر ءَ یک سالے ءَ پد 11 اگست 2018 ءَ گل ءَ وتی دومی تندجاہ انگریزی زبان ءِ تھ ءَ بندات کُتگ اَت۔ ھمے یکشلی ءَ برجاہ داران ءَ مروچی 9 مئی 2020 ءِ روچ ءَ گل ءَ گیشتر دیمروی دیان ءَ راجی زبان بلوچی ءُ براھوئی ءِ جتا جتائیں تندجاہ شنگ کنگ بیتگ اَنت۔
چار جتائیں زبان پرچا؟
بلوچستان ءَ اھوالکاری ترندیں استانی بندشانی آماچ اِنت۔ ھما اھوالکار کہ اے زوراکی(سنسرشپ)ءِ کش اتگیں لِکار ءَ چہ ڈن درآیگ، بلوچستان ءِ راستیں جاوراں، دمگی اگاں جھانی رسانکدراں سر کنگ ءِ جھد ءَکن اَنت، آ بیگواہ اگاں جَنَگ بیگ ءِ دروشم ءَ وت ھالے جوڑ بنت۔ھمیشی سوب ءَ وانوک ءُ راستیں ھالانی نیام ءَ مزنیں دُری یے ودی بیتگ۔ دی بلوچستان پوسٹ ءِ جوڑ کنگ ءِ مول بلوچستان ءَ اھوالکاری ءِ ھالیگیں جاہ ءَ پُر کنگ ءُ بلوچستان ءِ راستیں جاوراں اھوالکاریں ایمانداری، گیر جانبدار، گیر روایتی وڑ ءَ اھوالکاری ءِ نوکیں دور ءِ لوٹاں گوں ھمگرنچ بیگ اے دمگ ءَ ھوار سرجمیں جھان ءَ سرکنگ ءُ بلوچستان ءِ توار جوڑ بیگی اِنت۔
توار جوڑ بیگ، ھال ءُ اھوال سر کنگ ءِ ھاتر ءَ زبان درستاں مستریں وڑ اِنت۔ گل ءِ بندات اردو زبان ءَ کنگ بیتگ اَت، آئی مستریں سوب ھمے بیتگ کہ اردو زبان ءَ نہ تھنا گیشتریں بلوچ اُلس ونت کنت بلکیں اردو ءِ کارمرز کنگ ءَ گوں بازیں ھمسائیگیں راجانی کِرّ ءَ ھم ارزانی ءِ سر ءَ بلوچستان ءِ ھال سر بیت کن اَنت۔
اے وھد ءَ بلوچستان ءَ کجام ھم میان اُستمانی رسانکدار ءَ روگ ءِ موکل نیست، پمیشکا نیستی ءِ ھساب ءَ بلوچستان ءِ جاور داں میان اُستمانی رسانکدار ءَ سر نہ بنت۔ انگریزی زبان ءَ بلوچ اھوالکاری ءِ کمی ءَ مارگ ءُ داں دری راجاں بلوچستان ءِ توار ءِ سر کنگ ءِ ھاتر ءَ گل ءَ انگلش پتر جوڑ کُت ءُ دومی تندجاہ ءِ بندات انگریزی زبان ءَ کُت۔
بلوچی، بلوچانی درستاں مستریں گپ بیوکیں راجی زبان اِنت کہ نہ تھنا روبرکتی بلوچستان ءَ کارمرز کنگ بیت بلکیں روکپتی بلوچستان ءِ ھم مستریں زبان اِنت۔ بلوچی زبان ءَ اھوالکاری نہ تھنا بلوچی زبان ءِ دیمروی ءِ تھ ءَ یک مزنیں کِردے پیلو کُت کنت بلکیں اے وڑ ءَ ھما بلوچاں گوں ھم مردم ھمگرنچ بیت کنت کہ آ اردو ءُ انگریزی گپ کُت ءُ سرپد بیت نہ کن اَنت۔ اے دراھیں جیڑھاں دیم ءَ ایر کنگ ءَ پد گل ءَ ٹی بی پی بلوچی پتر جوڑ کُتگ ءُسرجمی ءَ جتاھیں تندجاھے ءِ بندات کُتگ۔
براھوئی، بلوچانی دومی مستریں زبان اَنت،بلوچی زبان ءِ تھ ءَ لھتیں بلوچ رسانکدار پیسر ءَ چہ جوانیں وڑے ءَ کار کنگ ءَ اَنت ءُ اھوالکاری ءِ گرانیں گالانی یکجاہ کنگ ءِ جیڑہ یک جوانیں کچ ءَ داں ٹھینتگ، بلے براھوئی زبان ءَ داں اے وھد ءَ یک ھم دلجمیں اھوالکاری گلے نیست۔ اے نیستی ءِ ھلاس کنگ ءِ ھاتر ءَ گلءَ براھوئی پتر جوڑ کُتگ کہ مزنیں وھدے ءَ چہ براھوئی اھوالکاری گرانیں گالانی جم کنگ ءِ ھاتر ءَ کار کنگ ءَ بیتگ ءُ مروچی دلجمیں وڑے ءَ ٹی بی پی براھوئی تندجاہ ءِ بندات کنگ بیتگ۔
دیمی گام؟
دی بلوچستان پوسٹ رسانکدار ھمے مھکم پگری ءِ سر ءَ اوشتوک اِنت کہ اھوالکاری ءِ مزنیں ءُ گھتریں رھبندانی سر ءَ کاربند بیان ءَ گل ءَ گیشتر دیمروی دیگ بیت۔ بلوچانی مزنیں کساسے سرائیکی ءُ پارسی زبان ءَ گپ جن اَنت۔ اے دوھیں زبانانی گیشی گل ءِ دیمتر ءِ کارانی ھاتر ءَ جیڑگ بیگ ءَ اِنت، بلے گل ءِ دل گوش جتائیں اھوالکارانی وسائلانی گیشی ءِ نیمگ ءَ گیشتر اِنت پمیشکا پہ آیوکیں کارانی سر ءَ کار بندات کنگ بیتگ ۔
ایشانی تھ ءَ درستاں ساری ٹی بی پی پبلیکشنز ءِ بن ھشت ایر کنگ اِنت۔ دی بلوچستان پوسٹ رسانکدار ءَ چہ اولی روچ ءَ جوانیں اھوالکار ءُ نبشتہ کارانی ھمراھداری گون بیتگ۔ اے نیام ءَ ھمے مارگ بیتگ کہ بازیں بلوچ کواساں، نبشتہ کاراں ءُ شائراں وتی گدارانی چاپ کنگ ءِ کمک نیست کہ آئی ءِ مستریں سبب استانی بندش اِنت، پمے ھاتر ءَ نہ تھنا بلوچ نبشتہ کار دلپروشی ءِ آماچ اَنت بلکیں دپتر ھم ناسرجمیں دروشمے ءَ اِنت۔ ھمے زلورتاں دیم ءَ ایر کنگ ءُ گل ٹی بی پی پبلیکشنز ءِ سر ءَ جوانیں وڑے ءَ کار کنگ ءَ اِنت۔
ایشی ءَ ابید نوکیں دور ءِ لوٹاں گوں ھمگرنچ بیگ ءِ ھاتر ءَ وتی دراجیں پالیسیانی تھ ءَ ٹی بی پی ریڈیو ءُ ٹی بی پی آن لائن ٹی وی ءِ جوڑ کنگ ءِ سر ءَ شور بندی کنگ ءَ اِنت۔
ٹی بی پی ءُ شما
دی بلوچستان پوسٹ رسانکدار زانتکار ءُ کتہ کاریں زانشتاں چہ چکاریں اھوالکارانی یک گلے کہ شپ ءُ روچ گوں مھنت ءُ جزبگ ءَ کار کنگ ءَ اَنت بلے گل ءِ سوبمندی ءِ درستاں مستریں سوب وانوک، نبشتہ کار ءُ جپاکشیں اھوالکار اَنت۔
مئے وانوکاں مدام گل ءَ دلبڈی داتگ، چُشیں وھد ءَ کہ گل ءِ تندجاہ بلوچستان ءَ استانی گلانی نیمگ ءَ چہ بند کنگ بیتگ اَنت، بلے پد ءَ ھم مئے وانوکانی کساس ءَ ھچ وڑیں کمی ءِ نیتکگ۔ وڑ وڑیں راہ کارمرز کنگ ءُ پد ءَ مئے وانوک داں ٹی بی پی ءَ سر بیگ ءَ اَنت۔
گل ءَ اے وھد ءَ سوھویں نبشتہ کارانی یک مزنیں کساسیں دلبڈی یے گون اِنت کہ ھمروچ جتائیں جیڑگانی سرءَ چاریں زبانانی تھ ءَ نبشتانک نبشتہ کن اَنت دی بلوچستان پوسٹ ءَ روان دے اَنت کہ آ گل ءِ شاھگان بیگ ءُ جنزگ ءَ کمک ءَ کن انت۔
ٹی بی پی ھالانی ھاتر ءَ ھالانی زیت ءُ نوکتریں ھال ءِ ربیدگے ءِ سر ءَ باور نداریت ۔ پمیشکا ھمک ھال ءِ راستی پیسر ءَ دلجم کنگ بیت پد ءَ آئی ءَ راستیں دروشمے ءَ نبشتہ کنگ بیت۔ گل ءَ بلوچستان ءِ راستیں جاورانی درگت دلجمیں ھال سرکنگ ءَ گل ءِ ھالکار مزنیں کرد اَنت۔ ٹی بی پی ءِ ھالکار گل ءِ سرین ءِ ھڈ ءِ دروشم ءَ اَنت۔
گل وتی وانوک، نبشتہ کار ءُ ھالکارانی منتوار اِنت۔ ما اوست دار ایں کہ گیشتر دیمروی، جوانیں پودشتی ءُ میان اُستمانی کچ ءِ رسانکدار ءِ ارزشست ءَ سر بیگ ءِ لوٹ ءَ پیلو کنگ ءَ مارا شمے ھمے کمک ءُ دلبڈی گون بنت۔