دی بلوچستان پوسٹ بلوچستان ءِ بنجاھی شھر شال ءَ وائس پار بلوچ مسنگ پرسنز ءِ زھرشانی گدان ءَ 3ھزار 9 سد ءُ پنجاہ ءُ دو روچ سرجم بیتگ – اُتل ءَ چَہ آیوکیں راجدار ءُ چاگردی باسک رھمت اُلا بلوچ ءَ وتی ھمراھانی ھمراھی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان کرتگ –
وی بی ایم پی ءِ رھشون ءَ گْوشت پاکستان ءِ زُلم ءُ کھرانی سیاہ ءُ تھار ءُ لنجیں شپ راجداپتر ءِ تاکانی سر ءَ ناشناس ءُ شناسیں اجب ناکیں زُلمانی کِسواں چَہ سریچ اَنت باز ھنچیں راجداپتری شپ مئے بھر ءَ کپتگ اَنت کہ ھمود ءَ اسد مینگل، اھمد شاہ ءِ وڑیں ورنایانی پیشانگ ءَ بیدے دگہ شَکے ءَ پاکستانی ریاست ءِ تیرانی دیمپانی بیتگ برے ھمے شپ تھاریں لنجاں ورنایانی لاش تیربرگ ءُ درچکانی کُنٹ ءَ درتکگ اَنت ءُ برے ڈِرل کرتگ ءُ آیانی چم کَش اِتگ اَنت مرگاپ ءِ شھیدیں بچانی لاچ ھنچش ساڑینتگ ءُ کوہ ءِ دامن ءَ چگل داتگ اَنت-
ماما کدیر ءَ گْوشت کہ زیرو پوائنٹ ءِ سڑک ءَ بہ گر داں پنجگور ءِ ڈناں برو، مرگاپ ءَ بہ گر داں شیراز ءِ کور ءَ داں بلوچستان ءِ دمک دمک اے راجدپتری کِسوانی تاکاں نبیسان ءُ پیداک اِنت کہ شھمات کرتگیں چھرگانی نشانی اَنت –
آئی ءَ گْوشت کہ جھان ءِ راجدپتر اے درائیں بامردانی وڑ ءَ آ ھم انسانیت ئِے واستا جنگ کنوکیں پلگرتگیں جد ءُ جھد ءِ بامرد اَنت کہ پد ما پد ءَ پیداک اَنت-
آئی ءَ گْوشت کہ بلوچ شھیداں وت الگری زندگی گوازینتگ ءُ مرگ ھم الگری وش آتک کرتگ بلے جھانی راجدپتر وتی راج ءُ زمین ءَ الگری مرگی ءَ نہ اِشتگ-