زامران: ناگ ءِ دمگ بازیں روچاں چَہ لشکری انگیر ءَ اَنت

پاکستانی لشکر ءُ چیریں ادارھانی کارندھاں دمگ انگیر ءَ کرتگ ءُ ھمک وڑیں مردمانی سُر ءُ پراں نگاہ ایر کرتگ –

ٹی بی پی ءِ اھوالکار ءِ رد ءَ زامران ءِ دمگ ناگ ءَ لشکری سر ءُ پراں گیشی اتکگ، گوستگیں یک ھپتگے ءَ دمگ ءِ مھلوک انگیر ءَ اَنت –

اھوالکار ءِ رد ءَ دمگ ءَ ھمک وڑیں سر ءُ پرانی سر ءَ بندش جتگ ءُ دامگی ھالرسان بند کرتگ اَنت –

دومی نیمگ ءَ دمگ ئے یک جھمنندے ءَ ٹی بی پی ءِ اھوالکار ءَ گوں گپ کرتگ کہ دمگ ئے مھلوک ءِ پس ءُ گوک زورانسری لشکر ءَ رپتگ ءُ برتگ اَنت –

دمگی مردماں بلوچستان ءِ راجداریں پاٹیاں گوں دزبندی کرتگ ءُ گْوشتگ کہ آ رمزان ءِ ماہ ءَ لشکر ءِ نیمگ ءَ جتگیں بندش ءِ بگیری ءَ توار چِست بہ کنت اَنت –

زانگ بہ بیت گوستگیں بازیں روچاں زامران ءِ دمگ تگران ءُ گیشتردان ءَ ھم لشکر ءِ لشکر کشی ءِ ھال بیتگ ءُ دمگ ئے مھلوک زورانسری لڈ ءُ باری ءَ بیھار داتگ اَنت