پناہ گیرانی زندمانی جیڑہ
ٹی بی پی شونگال
ساجد ھسین کہ چہ پاکستان ءَ وتی زند ءِ رکینگ ءِ ھاتر ءَ تتکگ ءُ 2019 ءَ سویڈن ءَ سیاسی پناہ داتگ، 2 مارچ 2020 ءَ بیگواہ بیت آ گُڈی رند ءَ سویڈن ءِ مزن شھر اسٹاک ھوم ءِ شمال ءَ کساس 56 کلومیٹر ءَ دیر اپسالہ ءِ دمگ ءَ رؤکیں یک ریلے ءَ سرکپگ ءَ گندگ بیتگ۔
یک مئی ءَ یک دمگی پولیس ءِ جارکش جون اس ارون ءَ رسانکدراں ساجد ھسین ءِ بیگواھی ءِ درگت ءَ نوکتریں ھال دیان ءَ گُشت “ آئی ءِ جون 23 اپریل ءَ اپسالہ ءِ نزیک ءَ فائریس کَور ءَ چہ دز کپتگ۔”
ساجد ھسین یک سوھوئیں بلوچ اھوالکارے اَت، آئی ءِ بیگواھی ءِ ھال سک زوت ھمک نیمگ ءَ شنگ ءُ تالان بیتگ اَت ءُ درستیں ملکی ءُ درملکی رسانکدراں آئی ءِ بیگواھی ءِ ھال ءَ شنگ کُتگ اَت۔ پدا ھم پاکستانی درملکی کارگس (دفتر خارجہ) ساجد ھسین ءِ بیگواھی ءُ رند ءَ جون ءِ دزکپگ ءِ سر ءَ وتی لُنٹ دوتکگ اِت اَنت۔
یک چُشیں اھوالکارے ءِ بیگواھی ءُ بیرانی ءِ سر ءَ پاکستان ءِ نہ مانگارگی (بے توجہی)، کہ آ پاکستان ءِ نامی ئیں رسانکانی تہ ءَ کارکنوکیں نامداریں اھوالکارے اَت، اھوالکارانی چاگرد ءُ درملک ءَ سیاسی پناہ ءِ ھاتر ءَ اتکگیں سیاسی جھد کارانی تہ ءَ ترُس ءُ بیم ودی کنگ ءِ سوبے جوڑ بیتگ۔
سویڈش پولیس ءَ وتی یک نوکتریں درشانے ءِ تہ ءَ گُشتگ کہ“ آٹوپسی رپورٹ کجام ھم وڑیں جرم ءِ آماچ بیگ ءِ گمان ءَ کم کنت،بلے پولیس پَٹ ءُ پول ءَ دنیگت سرجم بیگی اِنت۔”
اِشی پسہ ءَ اھوالکارانی میان اُستمانی گَل “اھوالکار ابید سیمسر” ءِ سروک ایرک ہاکئیر ءَ گُشتگ کہ “ دانکہ جرم ءِ آماچ بیگ ءِ گپ سرجم ءَ رد نہ بیت، داں ھما وھد ءَ اے گپ ءِ ترُس ھست کہ ساجد ھسین ءِ بیرانی آئی ءِ اھوالکاری کار ءُ آئی دی بلوچستان ءِ سرشونکار بیگ ءَ گوں بندوک اِنت۔”
ساجد ھسین ءَ بلوچستان ءَ انسانی ھکانی لگتمالی، منشیات ءِ کاروبار ءُ بلوچستان ءَ بیوکیں لشکری آپریشنانی سر ءَ نبشتہ کُتگ، کہ آئی سوب ءَ آ پیسر ءَ چہ پاکستان ءِ چیریں گلانی چمانی تہ ءَ اتکگ اَت ءُ جیڑھانی دیمپان اَت۔ آئی لوگ ءَ بیڑ برگ بیتگ اَت ءُ آئی ءِ کارانی لیپ ٹاپ ھم لشکریاں برُتگ اَت۔ گُڈسر ءَ آئی ءَ وتی کار، کھول ءُ ملک یل کنگ ءُ پنا گیری (باہوٹی) ءِ زند گوازینگ ءَ لاچار بیتگ اَت۔
ساجد ھسین ءِ مرگ ھما درستیں باھوٹ ءِ شوھاز ءَ دراتکگینانی ھاتر ءَ یک بیمناکیں کلوھے ، ھمایاں کہ وتی ملک یل کُتگ ءُ درانڈیھ ءَ باھوٹی شوھازگ ءَ اَنت۔ آ زند ءُ ترس کہ آیاں پُشت ءَ ویل کُتگ ءُ اتکگ اَنت، آ دگہ ملکاں ھم نی آیانی پُشت ءَ پیداک اِنت۔
دگہ یک بلوچ اھوالکارے ملک سراج اکبر کہ وتی ساہ رکینگ ءَ ءُ وتی زند ءَ رستگیں تُرسانی پد ءَ بلوچستان ءَ یل کنگ ءُ امریکہ ءَ پناہ گیری ءِ زند گوازینگءَ اِنت، وتی یک نبشتانکے ءِ تہ ءَ نبشتہ کنت کہ “انچش کہ یک رندے نیویارک ٹائمز ءَ نبشتگ اَت کہ پاکستانی سفارتی مشن “کمیونٹی آوٹ ریچ” ءِ نام ءِ سر ءَ امریکہ ءَ ھوار سرجمیں جھان ءَ دلجمیں رنگے ءَ درملک ءَ نیشتگیں پاکستانیانی چاریگی ءَ کنت۔”
یک پناہ گیرے ءِ ھساب ءَ آئی ءَ وتی تُرس درشان کنان ءَ گُشت” اگاں جمال خشوگی ءُ ساجد ھسین ءَ وتی ملکاں چہ دیر بیگواہ کنگ ءُ کُشگ بیت، گُڑا دگہ یک ھم پناہ گیر اے گمان ءَ مہ بیت کہ داں آیاں رسگ ءُ آیاں کُشگ بیت نہ کنت۔”
ھما ملک کہ اے جنگ آماچیں مردماں وتی گور ءَ باھوٹ دے اَنت، ھمایاں کہ وتی ملک یک رکیتگیں زند ءِ گوازینگ ءِ ھاتر ءَ اِشتگ، آ ملکاں اے گپ دلجم کنگ لوٹ ایت کہ آ اے پناہ گیراں پھریز ات بہ کنت۔ آیاں انچیں راھبند اڈ دیگ لوٹ ایت کہ ھما زالمیں سرکار اگاں ملکاں چہ اے مردماں وتی ساہ رکینتگ، آ اد ءَ ایشانی گور ءَ سر بیت مہ کن اَنت۔