بلوچستان ءِ ضلع لسبیلہ ءِ دمگ وندر ءُ ضلع ھُزدار ءِ دمگ انجیرہ ءَ جتاجتائیں وھداں پاکستانی لشکر ءِ دست ءَ یکیں کھول ءَ گوں سیادی داروکیں بازیں مردمانی آوارجنی ءِ وئیل دیم ءَ اتکگ انت، چہ آیاں بازینے انگت بیگواہ انت۔
ھالانی رد ءَ 25 مئی 2026 ءَ لسبیلہ ءِ دمگ چہ وندر ءَ پانزدہ سالی ئیں شھزاد ء مھمد شریپ زھری، شانزدہ سالی ایں جاوید ء ابدالکیوم زھری ءُ نوید اھمد ء ابدالکیوم زھری بیگواہ کنگ بیتگ انت، بلے 28مئی ءَ شھزاد ءُ جاوید یل کنگ بیتگ انت، ءُ نوید اھمد انگت بیگواہ انت۔
دومی نیمگ ءَ 12 اکتوبر2026 ءِ شپ ءِ کساس دو بج ءَ وندر ءَ ایف سی ءُ سی ٹی ڈی ءِ کارمندانی نیمگ ءَ چہ دو لوگاں بیڑ برگ بیتگ ،چہ اُود ءَ ریاز اھمد ء ابدالگپار زھری ءُ نئیم ء ابدالکادر زھری دزگیر کنگ ءَ پد بیگواہ کنگ بیتگ انت ، انگت ءَ آیانی بابت ءَ ھچ وڑیں سرپدی دیم ءَ نہ یتکگ
ھمے درچ ءِ دگہ یک وئیلے 10نومبر2026 ءَ ضلع ھُزدار ءِ دمگ انجیرہ ءَ پیش اتکگ، چہ اُود ءَ زھری چہ ھُزدار ءِ نیمگ ءَ سپر کنوکیں الی دوست ء مولا بکش انجیرہ ءِ ھند ءَ برجاھیں ایف سی کیمپ ءِ کارمنداں چہ دگ ءِ سر ءَ گوں وت برتگ ، آئی پد آ ھم بیگواہ انت۔
اھوالانی رد ءَ بیگواہ بیتگیں دُراھیں مردم وت ما وت نزیکیں سیاد انت۔