تمپ ءِ دمگ دازن ءَ واٹر سپلائی ءِ گور ءَ تیر سُپتگیں لاشے دزکپتگ دمگی اھوالدار ءِ رد ءَ دزکپتگیں لاش ءِ پجار سمیر ء ناسر ءِ نام ءَ زانگ بیتگ کہ آ مند ءِ دمگ گوبرد ءِ جھمنند اِنت کہ گوستگیں ماہ ءِ 24 تاریخ ءَ پاکستانی لشکری کارمنداں چہ مند ءِ دمگ گوبرد ءَ لشکر کشی ءِ وھد ءَ چہ شکاری پیر مھمد ءِ لوگ ءَ شپ ءِ سئے بج ءَ زورانسری آوار جتگ ءُ بیگواہ کتگ۔
دمگی اھوالدار ءِ رد ءَ 24 اکتوبر ءِ شپ ءِ سئے بج ءَ پاکستانی لشکر ءَ گوں دمگی ڈیتھ اسکواڈ ءِ کارمنداں گوبرد ءِ شکاری پیر مھمد ءِ لوگ ءَ ھوار دگہ بازیں لوگاں دور کتگ زھگ ءُ زالبول کم شرپ کتگ ءُ یکیں کھول ءِ چار مردم زورانسری آوار جتگ ءُ بیگواہ کتگ کہ آیانی تہ ءَ سمیر ناسر ھم ھوار بیتگ کہ مرچی آئی ءِ تیر سُپتگیں لاش دزکپتگ۔
بلوچ یکجہتی کمیٹی ءَ ھوار بی این ایم ءِ انسانی ھکانی ادراہ پانک ءَ ورنایانی بیگواھی ءِ ھبر راست کتگ بیتگ ءُ پاکستانی لشکر ءِ ھمک روچ ورنایانی زورانسری آوار جنی ھلاپ ءَ توار چست کتگ ءُ ورنایانی جان سلامتی ءِ لوٹ کتگ بیتگ۔