تجارتی راہ ءِ سر ءَ اُرشانی تہ ءَ گاڑی تباہ بوتگ انت، فورسز ءِ جانی تاوان ءِ ھال۔
گیشیں ھالانی رد ءَ شال ءُ کراچی ءِ تجارتی راہ ءِ سر ءَ خضدار ءِ ھند سمبا پھل ءَ سلاہ بندیں مردماں ایشی ءِ سیکورٹی ءِ ھاتر ءَ دیم داتگیں تجارتی گاڑی ءُ پاکستانی لشکر ءِ کارندھانی کاروان ءِ سر ءَ اُرش کتگ۔
ھالانی رد ءَ ارش کنوکاں راکٹ ءُ دگہ سلاہاں گوں بس، کنٹینر ءُ ایندگہ گاڑی نشانگ جوڑ کتگ انت، ہمے وھد ءَ دیراں تاں دمگ ءَ تیرگواری ءُ تراکانی توار گوشدارگ بوتگ انت۔
اے اُرش ءِ تہ ءَ تجارتی گاڑی تباہ کنگ ءُ پاکستانی لشکر ءِ کارندہ ٹپیگ بوھگ ءِ ھال ھست۔
دومی نیمگ ءَ سوراب ءِ دمگ ھاجیکا ءَ پاکستانی لشکر ءِ کاروان ءِ سر ءَ سلاہ بندیں مردماں اُرش کتگ کہ اود ءَ تراک ءَ گاڑی ءِ نشانگ جوڑ کتگ ءُ پد ءَ کاروان ءِ سر ءَ سلاہ بندیں اُرش کنگ بوتگ۔
زانگ بہ بیت کہ اے دمگاں بلوچ آجوئی لوٹوکیں سلاھ بندیں گل پرکار اَنت ءُ پاکستانی لشکر ءُ کاروباری گاڑیانی نشانگ جوڑ کنگ ءَ اَنت، البت انگت ھچ گل ءَ اے دوئیں وئیلانی زمہ واری نہ زرتگ۔
دومی نیمگ ءَ پاکستانی لشکر ءَ واشک ءَ سلاہ بندیں مردمانی جَنگ ءِ ٹاہ داتگ۔
پاکستانی واکدارانی رد ءَ فوج ءَ واشک ءِ دمگ پلنتاک ءَ اود ءَ سلاہ بندانی بنجل نشانگ جوڑ کتگ۔
واکدارانی رد ءَ اے اُرش ءَ پنچ مردم کشگ ءُ چار ٹپی کنگ بیتگ انت۔ ءُ بنجل ءَ سلاہ ءُ بارود دزکپتگ انت۔
پوج ءِ اے ٹاہ لس اھوالاں راست کنگ نہ بیتگ بلے پاکستانی پوج ءِ نیمگ ءَ ایشی ءَ پیش بازیں آپریشناں پیش ءَ آوار جتگیں مردم نشانگ کتگ ءُ کشتگ انت۔
واشک ءَ کشگ بیتگیں مردمانی پجار انگت ءَ پدر نہ بیتگ انت۔