بلوچستان ءِ دمگ قلعہ عبداللہ ءِ ھند سلطان شار ءَ پاکستان ءِ لشکر ءِ کمک ءَ ھستیں سلاہ بندیں گلے ءِ کیمپ ءِ سر ءَ سلاہ بندیں مردماں اُرش کتگ ءُ ایشی ءَ پد دمگ ءَ بازیں کلاکاں تاں ترندیں سلاہ بندیں جنگ برجاہ بوتگ۔
دمگی مردمانی رد ءَ اُرش کنوکاں کیمپ ءِ سر ءَ اُرش کنگ ءِ وھد ءَ اود یَ ھستیں بازیں کارندہ کشتگ اَنت ءُ ھمے وھد ءَ کاروائی ءَ پد کیمپ ءَ چہ سلاہ ءُ گاڑی ھم گون وت برتگ انت۔
دمگ ءِ مردمانی گشگ اِنت کہ اُرش ءَ پد پاکستانی لشکر ءُ سلاہ بندیں گل ءَ اُرش کنوکیں مردمانی ھلاپ ءَ آپریشن بندات کتگ کہ ایشی ءِ آسر ءَ سلطان شار ءُ آئی ءِ کش ءُ گوراں نزیک ءَ چار کلاک ءَ تیرگواری ءُ سلاہ بندیں جنگ برجاہ بوتگ۔
دمگی مردماں گشتگ کہ اے درگت ءَ دوئیں نیمگاں تاوان بوتگ بلے ٹپیگ ءُ بیران بوتگیں مردمانی کساس ءِ بابت ءَ زوت زانگ نہ بوتگ۔
وئیل ءَ چہ پد چہ شال ءَ سلطان شار ءِ نیمگ ءَ ایمبولینس مزنیں کساسے ءَ گندگ بوتگ انت بلے اے درگت ءَ ھچ وڑیں سرکاری کچ ءُ کساس شنگ کنگ نہ بوتگ ۔