ماشکیل : سلاہ بند مزنیں کچے ءَ شھر ءَ پُترتگ اَنت ءُ دستیگ کتگ تھانہ تباہ ءُ ایف سی پوجی بُنجل ءِ سر ءَ اُرش یکشل ءَ برجاہ

بلوچستان ءِ دمگ ماشکیل شھر سلاہ بند مزنیں کچے ءَ پُترتگ اَنت سرجمیں دمگ انگیر ءَ کتگ پولیس تھانہ تباہ، ایف سی بُنجل ءِ سر ءَ اُرش برجاہ-

گیشیں ھالانی رِد ءَ سلاہ بندانی مزنیں کچے ءَ ماشکیل ءِ شھر ءَ پُترتگ اَنت پولیس تھانہ ءُ کسٹم چیک پوسٹ دستیگ کنگ ءَ پد پولیس تھانہ تباہ کتگ-

وھدے ایف سی ءِ بُنجاھی بُنجل چاریں نیمگاں انگیر ءَ کتگ اُرش کتگ ءُ اُرش تنی وھدے یکشل ءَ برجاہ ءَ اِنت دمگ ءَ تُرندیں تیرگواری ءُ تراکانی توار اش کنگ بیگ ءَ اِنت-

ھمے میان ءَ سلاہ بنداں سئے پوجی کواڈ کاپٹر اُرش ءِ نشانگ کتگ ءُ دور داتگ اَنت ءُ دمگ ءَ سلاہ گشت کنگ اَنت-

دومی نیمگ ءَ ھُزدار ءِ دمگ توتک ءَ گوستگیں روچ ءَ سلاہ بندیں مردماں ڈیتھ اسکواڈ ءِ سروک شفیق مینگل ءِ سے اوتاکانی سر ءَ یکیں وھد ءَ اُرش کتگ ءُ اُرش ءِ آسر ءَ چار کارندہ مرتگ وھدے کہ یکے سلاہ بنداں دزگیر کتگ گوں وت برتگ-

ھمے میان ءَ سلاہ بنداں گونگو، آرچنو، پیشک، کٹاڈو ءَ بیڑبرتگ ءُ لھتے شکی ئیں مردم دزگیر کتگ ءُ وتی ھمراھی ءَ برتگ اَنت-

وئیل ءِ زمہ واری انگت ھچ گل ءَ نہ زرتگ اَنت-