بلوچ نودربرگل بی ایس او آزاد ءَ بلوچستان ءِ آجوئی روچ بزاں یازدہ اگست ءِ روچ ءِ درگت ءَ شنگ کتگیں درشان ءَ گوشتگ جھان ءِ بندپتر اے شو ن ءَ دنت کہ کسان ءُ نزریں راجانی سرءَمدام دری زورگیرانی چم سک بوتگ اَنت ءُ جھان ءِ مزنیں راج ءُ استاناں مدام پہ وتی راجی نپ ءُ سیتانی سرجم کنگ ءَ نزور ءُ کسانیں راج ایردست کتگ اَنت ۔اے راستی یے کہ بنی آدم ءِ دپتر چہ نزور ءُ زیردستیں راجانی ٹپاں پُر اِنت بلے بنی آدم ءِ گوستانک ،چہ دری زورگیرانی بگیری ءَ گھگیری ءِکسھاں چہ ہم زبھر نہ انت ۔زیردستیں راجانی راجدپتر شاھد اِنت کہ بدواہ ءُ دری زورگیرانی بگیری ءَ پاد اتکگیں راجاں وتی راجی شرپ ءُ پجار رکینتگ ءُ ہزاراں سرانی کُربان کنگ ءَ پد زیردستیں راج چہ دری زورگیرانی سانکلاں درآیگ ءُ جھان ءِ تہ ءَ وتی پجار ءُ بستار ءِ رکینگ ءَ سوبین بوتگ اَنت۔
آئی ءَ گوشتگ بلوچ راجدپتر ہم چہ دری زورگیری ءِ ویلاں زبھر نہ اِنت۔بلوچ ءِ مال ءَ مادناں ھوار بلوچ ءِ زِر مدام دری زورگیرانی نشانگ ءَ بوتگ کہ شانزدہمی کرن ءَ زورگیریں پرتگیزی بلوچ ءِ زر ءَ زیردست کنگ ءِ نیت ءَ کاینت بلے بلوچ ءِ نرمزاریں پسگ پہ وتی ماتیں گلزمین ءِ رکینگ ءَ چہ وتی ساہ ءُ سرانی کُربان کنگ ءَ چک ءُ پد نہ بنت ءُ زورگیراں چہ وتی ڈیھ ءَ در کشگ ءَ سوبین بنت ۔ہمے پیم ءَ ھردیں زورگیریں انگریز برصغیرھند ءَ زیردست کنگ ءِ چن ءُ لانچ ءَ بندات کنت گڑا بلوچ گلزمین ہم زورگیریں انگریز ءِ نشانگ ءَ بیت۔1839 ءَ انگریز سرکار گوں وتی پوجی لشکر ءَ قلات ءِ سر ءَ اُرش بندیت بلے خان ء قلات میر مھراب خان پہ بلوچ راجی شرپ ءُ پجار ءِ رکینگ ءَ مرگ ءَ شرپے لیک ایت بلے دری زورگیر ءِ دیم ءَ چم جھلی ءَ پہ وت بے شرپی ءُ گوں بلوچ گلزمین ءَ دگایے سر پد بیت ءُ جنگجاہ ءَ وتی ساہ ءَ پہ بلوچ گلزمین ءَ ندر کنت۔
آئی ءَ گوشتگ 1839 ءَ زورگیریں انگریز ءِ بگیریءَ میر مھراب خا ن ءِ گہگیری بلوچ راجدپتر ءِ تہ ءَ نوکیں درےپچ کنت۔بلوچ راج جتائیں پڑاں انگریز ءِ زوراکی ءِھلاپ ءَ گہگیری کن انت ءُ کساس 108 ءِ زیردستی ءَ پد بلوچ گلزمین چہ انگریز ءِ سانکلاں آجوبیت ءُ 11 اگست 1947 ءَ آزاتیں استانے بستار ءَ زانگ دیم ءَ کئیت۔ ریاست ءقلات ءِ نواب میر احمد یار خان 11 اگست 1947ءَ گوں بلوچ راج ءَ ہم کلام بیت ءُ درائینیت کہ من گوں شما مروچی بلوچی ءَ ھبر کناں ءُ دیمتر ءَ ہم گوں بلوچ راج ءَ وتی ماتی زبان ءَہم کلام باں ۔11اگست ءِ بلوچ استان ءِآجوئی ءَ رند بلوچ راج وتی استان ءِ مھکم کنگ ءُ بلوچ استان ءِ انتزامی کارانی مھکم کنگ ءِ چن ءُ لانچاں بندات کنت۔بلے دین ءُ شدت پسندی ءِ نام ءَ نگریز ءِ جوڑکتگیں نوکیں استان ، پاکستان ءِ بدیں چم بلوچ گلزمین ءَ سرءَ سک بنت ۔
بی ایس او آزاد ءِ جارکش ءَ گوشتگ اے دمگ ءِ تہ ءَ انگریز ءِ جوڑ کتگیں بد تھذیبیں پاکستان بلوچ راج ءِ مادن ءُ مڈیاں زیردست کنگ ءِ نیت ءَ بلوچ استان ءَ گوں پاکستان ءَ ھوار کنگ ءِ چن ءُ لانچ ءَ بندات کنت ، جناح کہ آجوئی ءَ پیسر استان ء قلات ءِ وکیل بیت ھمے درگت ءَ لھتیں نام نھادیں ءُ زرواریں بلوچ سرداراں کراچی ءَ لوٹائین ایت ءُ بلوچ گلزمین ءَ گوں پاکستان ءَ ھوار کنگ ءِ پندل سازیت۔استان قلات ءِ قانون ساز اسمبلی بزاں کہ ایوان ء بالا ءُ ایوان ء زیریں زورگیریں پاکستان ءِ اے شوربندی ءَ پہ بلوچ گلزمین ءُ بلوچ راج ءِ ھستانک ءَ ھترہ ءِ لیک اَنت ءُ پاکستان ءِ گوما بلوچ گلزمین ءَ ھوار کنگ ءِ ھلاپ ءَ مھمےبندات کن اَنت ۔قلات اسٹیٹ نیشنل پارٹی ءِ راھشون ءُ میر احمد یار خان ءِ برات آغا عبدلکریم خان وتواکیں بلوچ استان ءِ ھک ءَ بنت بلے 27 مارچ 1948ءَ پاکستان ءِ پوجی لشکر بلوچ گلزمین ءَ تپنگ ءِ زور ءَ زیردست کنت ءُ ہمے زیردستی ءِ بگیری ءَ بلوچ راج داں روچء مروچی پہ بلوچ گلزمین ءِ دوبر آجوئیءِ راجی جنز ءَ یکشل ءَ جھد ءَ اِنت ۔
آئی ءَ گوشتگ 11اگست بلوچ راجدپتر ءِ ہما رژنائیں روچ اِنت کہ بلوچ راج چہ 108 سال ءِ گلامی ء ِسانکلاں آجو بیت۔اے روچ پہ بلوچ راج ءِ دوبر آجوئی ءَ اہد ءُ پیمان ءِ روچ اِنت ، کہ بلوچ راج ناروائیں پاکستان ءِ زیردستیءَ ہچ وڑءَ نہ منیت ءُ ،پہ بلوچ راجی آجوئی ءَ نمیران بوتگیں پسگانی ھون دوبر رنگ کار انت ءُ مئےمھکمیں سِتک ءُ ایمان اِنت کہ گوں یکشلیں جھد ءَ ما دوبر وتی ڈیھ ءَ چہ زورگیریں پاکستان ءَ آجو کنیں۔مئے ھستیں راجی آجوئی جنز مئے باندات ءِراہ ءَ گشین ایت۔بلوچ راجی آجوئی جنز ءِ ھستیں مھکمی بانداتیں بلوچ استان ءِ توانائی ءِ مانزمان بیت کنت۔باسمائیں بلوچ ورنا بلوچ راجدپتر ءِ ویلاں گوں ہورتی ءَ وانگ ءِ جھد ءَ بہ کن اَنت ءُ بانداتیں استان ءِ جوڑشت ءُ مھکمی ءِ ھاتر ءَ ھستیں راجی آجوئی جنز ءَ گیش تاکتور ءُ مھکم بہ اَنت ۔