بلوچستان ءَ سیکیورٹی ترس ءِ بنیاد ءَ داں سیزدہ اگست ءَ بہ گر داں پانزدہ اگست ءَ بس سروس بند

بس ٹرانسپورٹ یونین ءِ بنشون ءِ رد ءَ سیزدہ، چاردہ، داں پانزدہ اگست ءَ چہ کراچی تربت، گوادر دونیمگی روانی مھتل کنگ بیتگ-

ٹرانسپورٹ یونین ءِ رد ءَ بس ٹرمینل بند بیت ءُ شانزدہ اگست ءَ ٹرانسپورٹ پچ کنگ بنت انت-

ھمے وڑ ءَ بلوچستان ءِ بازیں شھراں کرفیو جنگ بیتگ ءُ دکان بند کنگ بیتگ انت-

دومی نیمگ ءَ سرکاری بنشون ءَ داں چاردہ اگست ءَ انٹرنیٹ سروس بند کنگ ءِ جار پرینتگ کہ چریشی ءَ پد ڈیٹا سروس بند انت-

بلوچستان ءَ بلوچ سلاہ بندیں گلانی ترس ءَ بازیں شھراں کرفیو جنگ بیتگ ءُ بازیں شھراں شپ دیم ءَ دکانانی بند کنگ ءِ پرمان ھم دیگ بیتگ انت-

سرکاری بنشون ءَ وتی جارانک ءَ گشتگ کہ اگست ءِ ماہ ءَ بلوچ سلاہ بندیں گلانی زور گیش بیت ءُ آ بازیں جاھاں نشانگ کت کن انت ءُ گوستگیں روچاں شال ءَ پولیس ءِ بنشون ءَ گشتگ شال ءَ چار ھزار ءِ کچ ءَ سلاہ بندیں مردم شھر ءَ دستیگ کنگ ءِ جھد ءَ کن انت-

دومی نیمگ ءَ شال ءَ ریڈزون ءَ روکیں راھانی سر ءَ ٹرک ءُ کنٹینر ایر کنگ ءُ راہ بند کنگ بیتگ انت-

چہ شال ءَ سر بیتگیں ھالانی رد ءَ اسپنی دگ، چمن پھاٹک، جوائنٹ روڈ، زرگون روڈ، ءُ دگہ دگہ جاھاں روانی راہ بند کنگ ءُ جیڑہ ودینگ بیتگ انت-

دومی نیمگ ءَ ٹرین سروس ھم بند کنگ بیتگ ءُ راہ ءَ اوشتارینگ بیتگ-