چہ ھزدار ءُ عبدالقدوس زرک زئی ءُ آئی ءِ جنک بیگواہ، چہ شال ءَ یک ورنایے بیگواہ

بلوچستان ءِ دمگ ھزدار ءَ عبدالقدوس زرک زئی ءُ آئی ءِ ھبدہ سالی جنک اقسا آوار جنگ ءُ بیگواہ کنگ بیتگ انت- چہ شال ءَ یک ورنایے بیگواہ-

گیشیں ھالانی رد ءَ بلوچستان ءِ دمگ ھزدار ءَ زورانسری بیگواہ کنگ ءِ کیس دیم ءَ اتکگ کہ اود ءَ عبدالقدوس زرکزئی ءُ آئی ءِ 17 سالی جنک اقسا پاکستانی لشکر ءِ دست ءَ دزگیر کنگ ءَ پد ناشناسیں جاھے ءَ برگ بیتگ انت-

دمگی مردمانی رد ءَ 5 اگست ءِ شپ ءِ ساھت کساس 10 بج ءِ نزیک ءَ سی ٹی ڈی ءُ لس پوشاکی کارندھاں یکجائی ءَ آپریشن ءِ تہ ءَ ھزدار ءِ سول کالونی ءَ جاہ منندی کوارٹر ءِ سر ءَ اُرش کتگ۔ کارندہ لوگ ءِ تہ ءَ روگ ءَ پد جنین ءُ دگہ مردم لٹ شاپ کتگ انت –

کاروائی ءِ وھد ءَ عبدالقدوس زرکزئی ءُ آئی ءِ 17 سالی ئیں جنک اقسا آوار جنگ بوتگ انت۔ کارندھاں نہ دزگیر کنگ ءِ سبب گوشتگ ءُ نہ دگہ کانونی کارروائی یا کیسے ءِ بابت ءَ سرپدی داتگ۔ کھول ءِ گْوشگ اِنت کہ چہ اے دوئیں مردمانی برگ ءَ پد آیانی بابت ءَ ھچ وڑیں ھال ءُ اھوال دیگ نہ بوتگ ءُ نہ کہ اے گپ ھم گْوشگ بوتگ کہ آ کجام جاگہ ​​ءَ دیم دیگ بوتگ اَنت۔

سانمندیں کھول ءَ انسانی ھکانی گل، وکلا برادری ، سیاسی گل ءُ سول سوسائٹی ءَ چہ دزبندی کتگ کہ آ اے جیڑہ ءِ سر ءَ گامگیج بہ زیر انت ءُ عبدالقدوس زرکزئی ءُ آئی ءِ جنک اقساء ءِ یل کنائینک ءِ ھاتر ءَ وتی کرد ءَ پیلو بہ کن انت-

دومی نیمگ ءَ بلوچستان ءِ بنجاھی شھر شال ءِ ھند شریف آباد ءَ کلی کمبرانی ءَ محمد فیضان ء عبدالحامد کمبرانی گوستگیں شپ ءَ پاکستانی پوج ءَ لوگ ءَ دزگیر کنگ ءَ پد ناشناسیں جاھے ءَ برتگ-