کراچی ءِ دمگ گلشن اقبال ءَ پنچ اگست ءِ شپ ءَ پاکستانی چیریں ادارہ ءُ رینجرز ءِ دست ءَ آوار جنگ بیتگیں پنچ بلوچ نودربر یل بیتگ ءُ سلامتی ءَ وتی گساں سر بیتگ انت-
بلوچ اسٹوڈنٹس ایکشن کمیٹی ءِ بنجاھی جارکش ءَ ھال ءِ راست کنان ءَ گوشتگ اظھر بلوچ، غوث بخش بلوچ، شھزاد بلوچ، انیس بلوچ ءُ وسیم بلوچ کہ پنچ اگست ءِ شپ ءَ گلشن اقبال چہ کراچی ءَ پاکستانی رینجرز ءَ زورانسری آوار جتگ انت ءُ پد ءَ یل کنگ بیتگ ءُ وتی لوگاں سر بیتگ انت-
گل ءِ جارکش ءِ رد ءَ زورانسری آوارجنی ءِ آماچیں دو بلوچ نودربر خلیل بلوچ ءُ زبیر بلوچ انگت ءَ بندیگ انت ءُ آیانی بارو ءَ ھچ وڑیں ھال ءُ اھوال نیایگ انت-
دومی نیمگ ءَ اچ شال ءِ دمگ سریاب دگ ءَ دو کم اُمریں نودربت صفی اللہ بلوچ ء مھر اللہ ءُ مدثر ء شیردل بلوچ بیست ءُ چار جولائی دوھزار ءُ بیست ءُ شش ءَ کساس سھب ءِ پنچ ءَ سی ٹی ڈی ءُ آئی ایس آئی ءِ کارندھاں آوار جتگ انت کہ ایشانی ھردوکانی اُمر چاردہ چاردہ سال گوشگ بوتگ-
ھمے وڑ ءَ چہ شال ءَ نوزدہ سالی ئیں پوریاگر نجیب اللہ بلوچ ء سرور بلوچ ھپت جولائی ءَ دوھزار ءُ بیست ءُ شش ءِ شپ ءِ ساھت دو ءَ اَچ وتی لوگ ءَ سی ٹی ڈی ءُ آئی ایس آئی ءَ آوار جتگ ءُ چریشی ءَ پد آ بیگواہ انت-