بلوچستان : بازیں مزنیں شھراں کرفیو جنگ بیتگ : تربت ءُ شال ءَ سیکیورٹی شیوار کتگ

بلوچستان ءِ دمگ ھُزدار، کلات، نوشکی ، سوراب ءَ تھسیل زھری ءَ کرفیو ءِ سوب ءَ ھمکروچی زند سانمند بیتگ ، وھدے کہ شال ءُ تربت ءَ پوج ءِ واکدار ءِ نیمگ ءَ چہ سیکیورٹی شیواری کتگ-

گیشیں ھالانی رِد ءَ بلوچستان ءِ ھکومت ءَ پوج ءِ واکدار ءِ گوشگ ءِ سر ءَ بلوچستان ءِ جتاجتائیں مزنیں شھراں کرفیو یا تُرندیں پابندی جتگ، وھدے کہ شال ءَ سیکیورٹی شیواری ءِ بُنیاد ءَ ریڈ زون بند کتگ-

بلوچستان ءِ تھکاری وزیر ءَ شھریاں کرفیو ءِ جنگ ءِ رسانکدر رپورٹس رد کتگ، بلے دمگی ھساب ءَ انتزامیہ کڈن کنگ ءِ ھال اِنت کہ آ بیگاہ شش ءَ سای دکان ءُ کار ءُ باری بُنجاھاں بند بہ کن اَنت-

کلات شھر ءِ واکدار ءَ مگرب بیگ دکانانی بند کنگ ءُ شھریاں لوگاں نندگ ءِ کڈن کنگ بیتگ اَنت، وھدے کہ شھر ءَ پاکستانی پوج ءِ مزنیں کچے ءَ کارندہ ساڑی اَنت ءُ تھی ءَ ڈنی راہ بند کنگ بیتگ اَنت-

چہ کلات ءَ ھالانی رِد ءَ پاکستانی پوج ءَ شھر ءِ بازیں گچین ءِ شھدگانی سر ءَ کنڈ کُنڈیتگ ءُ گاڑیانی روگ ءِ مھتل دارگ ءِ ھال اِنت-

گوستگیں روچ ءَ ھُزدار ءَ ھم مگرب ءِ شش ءَ پد کار ءَ باری بُنجاہ بند کنگ پرمان دیگ بیتگ-

ھمے وڑ مروچی تربت ءَ سیکیورٹی شیواری ءِ سوب ءَ ایف سی ءُ پولیس ءِ گیشیں کارندہ شھر ءِ جتاجتائیں ھندانی سر ءَ اوشتارینتگ اَنت، وھدے کہ تھی ءُ ڈنی راھانی سر ءَ چاروگی ءُ پٹ ءُ پول ءِ کار سک تُرند کتگ، تربت ءَ گوستگیں بازیں روچاں چہ دفعہ 144 ھست اِنت-

بلوچستان ءِ بُنجاھی شھر شال ءَ بلوچانی دمگاں ایف سی ءِ کارندہ اوشتارینگ بیتگ اَنت، وھدے کہ شھر ءِ ریڈ زون سرجمی ءَ بند کتگ-

شال ءَ گوستگیں روچ ءَ پولیس واکدار ءَ شیواری شنگ کنان ءَ ٹاہ داتگ کہ بلوچ لبریشن آرمی ءِ چار ھزار جنگول شھر ءَ نشانگ جوڑ کُت کن اَنت، بلے ھکومتی جارکش ءَ پولیس ءِ اے نوٹیفکیشن رسانکدر ءِ رپورٹس رد کتگ-

ھمے وڑ دمگی انتزامیہ ءَ سوراب ءَ سیکیورٹی ءِ جاور ھالانی پُشدر شش اگست 2026 ءِ مگرب ءَ تاں ھشت اگست ءِ سُھب ءِ شش کرفیو جنگ پرمان داتگ دکان ءُ کار ءُ باری بُنجاہ بند کنائینتگ اَنت-

دمگی انتزامیہ ءَ سرجمیں شھری کڈن کتگ اَنت کہ داتگیں وھداں بے زرورت ءَ لوگاں چہ دراھگ ءَ پھریز بہ کن اَنت ءُ سیکیورٹی ایس او پیز ءِ تُرندی ءَ کار بہ کن اَنت-

ھمے وڑ بلوچستان ءِ دمگ نوشکی ءُ تھسیل زھری گوستگیں بازیں ماھاں چہ کرفیو ءِ تہ ءَ اَنت، وھدے کہ گوستگیں ماہ مستونگ ءِ دمگ کھڈکوچہ ءَ ھم کرفیو جنگ بیتگ کہ تنی وھدت برجاہ ءَ اِنت-