بلوچستان ءَ کدرتی آپاتی آماچ بیتگیں مھلوک ءِ کمک کنوکیں ادارہ پی ڈی ایم ءِ واکدار ءِ گوشگ انت شال ءِ دمگ سورینج ءَ اشکرانی کھن ءَ پیش اتکگیں وئیل ءِ سبب ءَ بیران بیتگیں مردمانی 34 لاش کش اتگ انت-
اے دمگ ءَ گوستگیں روچ ءَ بوتگیں وئیل بلوچستان ءَ اے سال ءَ اشکرانی کھن ءَ درستاں مستریں وئیل انت-
پی ڈی ایم اے ءِ آپریشن منیجر محمد فھد ءَ آدینگ ءِ سھب ءَ گشتگ کہ دگہ دو کاریزکارانی لاش ءِ درگیجگ ءِ ھاتر ءَ ریسکیو آپریشن برجاہ انت۔
سورینج کجا انت؟
سورینج بلوچستان ءِ بنجاھی شھر چہ شال ءَ نزیک ءِ 40 کلومیٹر رودراتک ءَ انت۔ اے یک کوھستانی دمگے کہ اود ءَ مزنیں کساسے ءَ اشکرانی کھن ھست انت۔
سورینج ءُ آئی ءِ کش ءُ گور ءِ دمگاں گوستگیں وھداں ھم اشکرانی کھناں وئیل بوتگ اَنت۔
بلوچستان ءَ دگہ نوکیں زرکاری کمی ءِ سوب ءَ اشکرانی ءِ درکپگ یک مزنیں واپارے۔ اشکرانی کھن گیشتر شال، کچھی، ہرنائی ءُ دکی ءِ دمگان انت کہ اود ءَ ھزارانی مزدور زانگ یا بے زانگ ءَ کاریزکاری ءَ گوں بندوک انت-
کلانیں پوریاگر رھشون لالا سلطان ءِ گشگ انت کہ نوکیں وھد ءَ ایمنی ءِ بندوبست ءُ کنٹریکٹنگ سسٹم ءِ نہ بوھگ ءِ سبب ءَ بلوچستان ءِ کاریزانی وئیلانی کچ ایندگہ اُستانی کساس ءَ گیشتر انت ۔
آئی ءِ گشگ اِنت کہ اے وئیلانی تہ ءَ ھر سال مزنیں کساسے ءَ کاریزکار بیران ءُ ٹپی بنت۔