بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بی ایل اے ءِ پیشگامیں یونٹ فتح اسکواڈ ءَ دگہ یونٹانی ھمراھی ءَ زورگیریں پاکستانی لشکر ءِ مزنیں کاروان ءِ سر ءَ ھمگرنچیں ، مھکمیں ءُ بے دروریں اُرش کتگ ءُ آئی ءِ سیکورٹی فورسز ءُ دمگ ءَ آیوکیں کمکی کارندہ نشانگ کتگ اَنت اے کارروائیانی تہ ءَ زور گیریں لشکر ءِ 3 اپسراں ھوار 62 کارندہ جاہ پہ جاہ ءَ مرتگ اَنت ءُ مزنیں کساسے ءَ ٹپیگ بوتگ اَنت۔ اے ھترناکیں جنگ ءُ یک ھونی جنگے کہ دژمن ءِ نیمگ ءَ دیم داتگیں مزنیں کساسے ءَ برزی کمک ءَ جاڑیگ بوگ ءَ دو روچاں برجاھیں ھونریچی جنگ ءِ دراھیں سوبمندی گپتگ ءُ سرمچار سلامتی ءَ وتی بنجلاں سر بیتگ انت-
جارکش ءَ گوشتگ پنچ شمبے ءِ روچ ءَ 12بج ءِ نزیک ءَ چہ شال ءَ دیم پہ پنجگور ءِ نیمگ ءَ دیم ءَ جنزوکیں زورگیریں پاکستانی لشکر ءِ کاروان ”زراب“ ءِ پیشگی انٹیلی جنس ءِ زانتکاری ءِ بنیاد ءَ بی ایل اے سرمچاراں راہ بستگ ءُ نشانگ جوڑ کتگ۔ کاروان ءِ تہ ءَ 18 بس ءُ درزناں سیکورٹی گاڑی ھوار بیتگ انت کہ ایشی ءِ تہ ءَ 91 ونگ، 164 ونگ، 59 ونگ، پنجگور رائفلز، مکران اسکاؤٹس ءُ دشت اسکاؤٹس ءِ ھوار زورگیریں لشکر ءِ جتا جتائیں فوجی ونگز 550 ءَ چہ گیش سلاہ بندیں کارندہ ھوار بوتگ انت۔
جارکش ءَ گوشتگ بی ایل اے ءِ پیشگامیں یونٹ ”فتح اسکواڈ“ ءَ کھڈکوچہ ءِ ”گرو“ ءَ کاروان ءِ دیم ءُ آئی ءِ مستریں سیکورٹی گاڑیانی سر ءَ گوں وتکار ءُ مزنیں سلاھاں ناگتی اُرش کتگ۔ سرمچارانی اے اُرش ءَ زورگیریں لشکر ءِ 4 بس زد ءَ بوتگ اَنت کہ چہ ایشاں یک بسے سرجم ءَ سوتکگ ءُ ھاک بوتگ ءُ سواریں درستیں کارندہ ھما جاہ ءَ مرتگ اَنت۔ دومی نیمگ ءَ سرمچاراں زورگیریں لشکر ءِ افسرانی یک ھاسیں گاڑی یے ھم نشانگ جوڑ کتگ ءُ سرجم ءَ تباہ کتگ کہ ایشی ءِ آسر ءَ گاڑی ءِ تہ ءَ ھواریں 3 مزنیں افسر جاہ پہ جاہ ءَ مرتگ اَنت۔
جارکش ءَ گوشتگ سرمچارانی دگہ ٹولی ءَ کاروان ءِ سیکورٹی ءِ ھاترا دیم داتگیں رند ءِ گاڑیانی سر ءَ رپکاری ءِ سر ءَ ارش کتگ ءُ آہانی پیشگامی سرجم ءَ لنگڑ کتگ کہ دژمن ءِ پھریزی لڑ پروشتگ چہ اُرش ءَ رند پد وھدے کہ زورگیریں لشکر ءَ چہ کش ءُ گور ءِ کیمپاں گیشیں کمک ءِ روان دیگ ءِ جھد کتگ گڑا سرمچاراں کہ پیسرا چہ سنگر گپتگ آ دگہ دو جتا جتائیں جاھاں آھانی سر ءَ پاد پروشیں اُرش کتگ۔ اُرشانی سوب ءَ دژمن ءِ لشکر ءَ را وتی زند ءِ رکّینگ ءِ ھچ وڑیں موہ نہ رس اتگ ءُ سرجمیں دمگ ءَ بازیں کلاکاں تراکانی تواراں زمین جکسینتگ-
جارکش ءَ گوشتگ زمینی میدان ءِ سر ءَ ترندیں پروشی ءَ پد زورگیریں پاکستانی لشکر ءَ سرجمیں دمگ ءِ انگیر کنگ ءِ بے سوبیں جھد ءَ گن شپ گیلی کاپٹر، جنگی جھاز، ڈرون ءُ مزنیں بالی اُرد ءِ کارمرز کتگ کہ ایشی ءِ سبب ءَ جنگ دو روچ ءُ شپ ءَ برجاہ بوتگ۔ دژمن ءَ نوکیں برزی ءُ زمینی ٹیکنالوجی ءُ بے رھبندیں بمب اُرشانی بے رھبندیں کارمرز کُتگ کہ ایشی ءَ چہ راجمان ءِ جاگہ، مسیت ءُ مدرسھاں تاوان رس اِتگ بلے سرمچاراں جوانیں رپکی رھبند، گوریلا جنگی ھُنر ءُ راہ ءُ رھبندانی زانگ ءَ دژمن ءِ دراھیں دیمی اُرش پروشتگ انت۔ اے ھترناکیں جنگ ، دو روچ ءَ برزی بمبتراک ءِ ابید فتح اسکواڈ ءُ دگہ یونٹانی درستیں سرمچار سرجم ءَ واتر بوتگ ءُ وتی آپریشنل مول ءُ مراد ءِ سرجم کنگ ءَ پد وتی نامینتگیں جنگی دمگاں ایمن ءُ سلامت شتگ انت۔
جارکش ءَ گوشتگ اے گپ کہ دو روچ ءِ چشیں مزنیں جنگے ءَ یک سرمچارے ھم ٹپی نہ بوتگ، 550 ءَ چہ گیش کارندھانی کاروان ءِ تباہ کنگ ءُ دژمن ءِ سرجمیں بالی اُرد ءِ بے سوب کنگ بی ایل اے ءِ جوانیں رپکاری، بے دروریں رھبند ءُ بے دروریں اُرش زمینی زانشت ءِ راستی انت۔ اے سوبمندی پہ زورگیریں پاکستان ءِ سیکورٹی ادارھاں یک پدریں کلوھے کہ بلوچ سرمچار زمینی زانت ءُ راجی جزم ءِ دیم ءَ آہانی دیمروئی کتگیں ٹیکنالوجی، برزی بمبتراک، ءُ ھسابی کارندہ سرجم ءَ بے وس انت۔ بلوچ لبریشن آرمی وتی اے جزم ءَ پد ءَ پدر کنت کہ زورگیریں لشکر ءِ سر ءَ اے وڑیں ھترناکیں، مھکم ءُ اسٹریٹجک اُرش داں راجی آجوئی ءِ گڈی مول ءُ مراد ءَ گوں ترندی ءَ برجاہ بنت۔