بلوچستان ءِ جتاجتائیں دمگاں پاکستانی پوج ءُ راھانی بندگ ءِ زمہ واری بی ایل ایف ءُ بی آر جی ءَ منّ اِتگ اَنت
بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کتگیں درشان ءِ تہ ءَ گوشتگ کہ بی ایل ایف ءِ سرمچاراں بیست جولائی 2026 ءَ چاگی ءِ ھند دالبندین شھر ءَ ڈھڈر ءَ ایکسائز ءِ یک چوکی یے دستیگ کرتگ ءُ سے کارندہ دزگیر کرتگ، چہ آیاں یک نائن ایم ایم وتاس ءُ دو سرکاری گاڑی پچ گپتگ اَنت۔ ایکسائز ءِ اے چوکی پہ شال تفتان دگ ءَ زر گرگ ءَ جنگ بیتگ کہ آ لس بلوچ ءُ شھدگ ءَ روکیں چہ مردماں ٹیکس ءِ نام ءَ باجگری گرگ ءَ بوتگ۔ دزگیریں کارندہ چہ گل ءِ راھبندانی رد ءَ کڈن کنگ ءُ یل کنگ بوتگ اَنت آ دگہ بر ءَ مھلوک دژمنیں کاراں ھوار نہ بنت ءُ چہ زورگر ءِ کمکاری ءَ چہ مھلوک ءِ تاوان دیگ ءَ وت ءَ گستا دار اَنت۔ بی ایل ایف تچک ءَ گوش ایت کہ مھلوک ءِ کمشرپ کنگ ءُ لٹ ءُ پل ءَ ھواریں ناشرکاراں کدی نہ بکش ایں۔
جارکش ءَ گوشتگ کہ دگہ یک کاروائی یے ءَ سرمچاراں 18 جولائی 2026 ءَ زامران ءِ ھند زامری تیر کیک ءَ زورگریں پاکستانی پوج ءِ مزنیں بنجل ءِ سر ءَ گوں مزن ءُ وتکاریں سلاھاں اُرش کرتگ۔ ایشی آسر ءَ زورگریں پوجءَ جانی ءُ مالی تاوان بوتگ۔
جارکش ءَ گوشتگ کہ دگہ یک کاروائی یے ءَ بی ایل ایف ءِ سرمچاراں 16 جولائی 2026 ءَ سوراب ءِ ھند دمب ءَ زورگریں پوج ءِ مزنیں بنجل ءُ ڈن ءِ پھازداریں چوکیانی سر ءَ گوں راکٹ لانچر ءُ وتکاریں سلاھاں اُرش کرتگ۔ اے کاروائی ءِ بندات ءَ بنجل ءَ ڈن زورگریں پوج ءِ یک کیپٹن ءُ دو ایس ایس جی کمانڈواں ھوار شش کارمندانی سر ءَ اُرش کرتگ ءُ کشتگ اَنت۔ اے کاروائی ءِ میانءَ چوکیانی کارندھاں سرمچارانی سر ءَ تیرگواری کرتگ، چہ بنجل ءِ تہ ءَ سرمچارانی سنگرانی سر ءَ باز مارٹر گولا آس دیگ بیتگ۔ سرمچاراں پسھی کاروائی کرتگ ءُ چوکی ءِ یک کارندھے گوں اسنائپر ءَ نشانگ کرتگ ءُ کشتگ۔ کاروائی ءِ آسر ءَ یک پوجی کیپٹن ءُ دو ایس ایس جی کمانڈواں ھوار دژمن ءِ ھپت کارندہ مرتگ ءُ باز ٹپی بیتگ اَنت-
جارکش ءَ گوشتگ کہ 15جولائی 2026 ءَ سھب ءَ شش ءُ چل ءَ زورگریں پاکستانی پوج ءَ وتگڑیں امن پوج ءِ نام ءَ کارکنوکیں ڈیتھ اسکواڈ ءِ ھمراھی ءَ موساکیل ءِ ھند کینگری ءَ بی ایل ایف ءِ سرمچارانی یک تر ءُ گردی اوتاکے ءِ انگیر کنگ ءَ بے سوبیں جُھد کرتگ۔ بنجل ءِ سرمچاراں چہ وتی بودناکی ءُ چیرجنگی شوربندیاں دژمن ءَ را ءَ دیم ءَ آھگ ءِ موہ نہ داتگ ءُ پہ وتی پھریزگ ءَ سنگر گپتگ۔ چہ ایشی ءَ پد تیرگواریانی درچ بندات بوتگ ءُ زورگریں پوج ءُ کشندہ ٹولی ءِ گون ءَ دیم پہ دیمی میڑ داں چار اداراں یکشل ءَ برجاہ بیتگ۔ اے کاروائی ءِ میان ءَ سرمچارانی چہ ترندیں پسھی کاروائی ءِ آسر ءَ زورگریں پوج ءِ سے کارندہ مرتگ، پوج ءُ کشندہ ٹولی ءِ باز کارندہ ٹپی بیتگ اَنت-
جارکش ءَ گوشتگ کہ چہ زمینی ءِ جنگ ءَ پروش ءُ تاواناں پد دژمن ءَ بالی کمک گوں بوتگ۔ ھیلی کاپٹراں جنگجاہ ءُ نزیکیں کوھاں داں شش اداراں تیر ءُ بمبگواری کرتگ، پروش وارتگیں زمینی پوج ءَ سرجمیں کوہ نشانگ کرتگ ءُ مارٹر آس داتگ۔ چہ دژمن ءِ اے ترندیں بمبگواری، مارٹر آس دیگ ءُ مزنیں انگر ءَ ابید بی ایل ایف ءِ درسیں سرمچار چہ وتی جنگی بودناکی ءُ سوبمندیں شوربندی ءِ رد ءَ ھچ وڑیں جانی ءُ مالی تاوان نہ وارتگ ءُ چہ دژمن ءِ انگر ءِ پروشگ ءُ پہ سلامتی درکپگ ءَ سوبین بوتگ اَنت۔
آئی ءَ گوشتگ کہ دگہ یک کاروائی یے ءَ سرمچاراں پانزدہ جولائی 2026 ءَ چاگی ءِ ھند پدگ بادین ءَ گوں سندک بروجیکٹ ءَ بندوکیں تیل بروکیں ٹینکر تیرگواری کرتگ ءُ تاوان داتگ اَنت۔
ھمے وڑ بلوچ ریپبلکن گارڈز ءِ جارکش دوستین بلوچ ءَ وتی درشان ءَ گوشتگ کہ بی آر جی ءِ سرمچاراں دوشی دگ بندی کتگ ءُ گاڑی پٹ ءُ پول کرتگ اَنت۔ دگ بندی ءِ میان ءَ زورگریں پوج ءَ دیم ءَ آھگ ءِ جُھد کرتگ سرمچاراں پسھی کاروائی ءَ دژمن ءَ جانی ءُ مالی تاوان بوتگ۔
جارکش ءَ گوشتگ کہ دوشی شپ ءَ بگر دانکہ مرچی بیگاہ ءَ جتاجتائیں ھنداں ڈھاڈر، میرباگ ءُ کلمدین ءَ سرمچارانی تر ءُ گرد ءِ میان ءَ ھچ وڑیں ریاستی یا سرکاری ادارھانی کارندہ چہ اود ءَ نہ گوستگ اَنت۔ دگ بندی ءِ میان ءَ سرمچار گوں وتی راج ءِ مردماں سک گوں مھر ءُ شرپ ءَ پیش بیتگ اَنت۔
درشانانی گُڈی ءَ دوئیں گلاں بیتگیں سرجمیں اُرشانی زمہ واری منّ اِتگ اَنت-