جیونی ءِ دمگ کُنٹانی ءَ مزدوری کنوکیں دو برات، امام ءُ محمد عمر ء محمد الیاس، جھمنند مند شابان بازار، جمعہ ءِ روچ ءَ چہ جیونی ءَ وتی لوگ مند ءَ آیگ ءَ بیتگ اَنت- اِھوالکار ءِ رِد ءَ وھدے آ کیچ ءِ دمگ بالیچہ کراس ءَ سر بیتگ اَنت گُڑا راہ ءَ آیانی موٹر سائیکل ءِ پٹرول ھلاس بیتگ اَنت پمیشکا آ اود ءَ اوشتاتگ اَنت-
اِھوالکار ءِ گوشگ اِنت کہ اے میان ءَ پاکستانی پوج ءَ دوئیں برات گپتگ اَنت ءُ پد آ تیرگواری کتگ ءُ کُشتگ اَنت-
مروچی دوئیں براتانی تیرسُپتگیں لاش پولیس ءَ کھول ءِ دست ءَ داتگ اَنت چریشی ءَ پد آ آیانی بُنکی ھنکین کبرستان سورو مند ءَ کل ءُ کسارت کنگ بیتگ اَنت-
دیمتر ءَ گوشگ بیتگ کہ وھدے بالیچہ ءِ نزیک ءَ آیانی موٹر سائیکل ءِ پٹرول ھلاس بیتگ اَنت گُڑا آیاں اود ءَ چہ راھگوزے ءَ چہ وتی واستا پٹرول آرگ ءِ دزبندی کتگ راھگوز پٹرول زیرگ ءَ شتگ- بلے وھدے واتر اتکگ گُڑا آئی ءِ رد ءَ آئی ءَ دیستگ کہ وئیلجاہ ءَ پوج ءِ کارندہ ساڑی بیتگ اَنت کہ پد آ واتر دیم چکرینتگ – راھگوز ءَ دیمتر ءَ گوشتگ کہ اے میان ءَ آئی ءَ تیرگواری ءِ توار ھم اش کتگ-