اکتر مینگل ءَ شال ہنہ اوڑک ءِ وئیل ءَ سانمندیں کھولانی گوم ءَ دلپدردی درشانتگ ، آمیدگسی کمیشن ءُ زھرشانی زرمبشت ءِ پلامرزی ءِ جار جتگ ۔
بلوچستان نیشنل پاٹی (مینگل) ءِ سروک سردار اکتر جان مینگل ءَ شال ہنہ اوڑک ءِ وئیل ءَ بیران بوتگیں پولیس کارمندانی ھاتر ءَ برجاھیں نندانک ءَ بھر زرتگ ءُ سانمندیں کھولانی گوم ءَ دلپدردی درشان اتگ ۔ ننداک ءَ نشتگیں مردمانی گوم ءَ تران کنان ءَ وئیل ءِ آمیدگسی پٹ ءُ پول کنگ ءِ لوٹ کتگ ءُ مردم باور کنائینتگ انت کہ دیمتر ءَ زھرشانیاں کمک کنت ۔
تران کنان ءَ اکتر مینگل ءَ گوشتگ کہ زیارت ءِ وئیل ءِ سرا بوؤکیں اے زھرشانی یک وئیلے ءِ رد ءِ امل نہ ایں بلکنہ پاکستان ءِ جوڈ بوگ ءَ چہ اے درچ برجاہ انت ۔ آئی ءَ گوشتگ کہ ریاست ءَ چہ بلوچستان ءِ مھلوک ءِ ھون ءَ وتی معیشیت برجم داشتگ وھدیکہ بلوچستان ءِ مڈی ٹیل ، گیس ءُ مادناں چہ نپ چست کنگ ءَ انت بلے ادا جاھمنندیں بلوچ ءُ پشتون راج دلگوش دیگ بوگ ءَ نہ انت ۔
آئی ءَ گوشتگ کہ ریاستی ادارھانی چماں بلوچستان ءِ مھلوک ءَ مردمی ءِ ھچ ارزشت نیست ھما وھد ءَ زلورت ءِ بیت کارمرز ءِ کنت ءُ پدا بیھال کنگ بنت ۔
آئی ءَ پشتون راج دلگوش گور کنان ءَ گوشتگ کہ وھدیکہ بلوچستان ءَ بلوچ راج ءِ کشت ءُ کوش ءُ چکچینی برجاہ ات گڈا بلوچ راج ءَ امیت داشتگ ات کہ پشتون سروک آیانی ھمکوپگی ءَ اوشت انت بلے چوش نہ بوتگ ۔
آئی ءَ گوشتگ کہ بلوچ رھشوناں ھما وھد ءَ اے گپ جتگ کہ ھما زوراکی بلوچانی سرا بوگ ءَ انت یک روچے پشتونانی سرا ھم کئیت ءُ مروچی ھما جاور اتکگ انت ۔ مروچی پشتون راج ھما زلم ءُ زوراکیانی دیمپانی ءَ کنگ ءَ انت بی این پی آیانی گوم ءَ اشتوک انت داں آکر ءَ ۔
اکتر جان مینگل ءَ گوشتگ کہ بلوچستان ءَ بلوچانی گار کنگ ءِ ھاتر ءَ ریاست ءَ ھند ءُ دمگانی تہ ءَ ڈیت اسکواڈ جوڈ کتگ کہ آیاں مردمانی ژانگولیں جون دگانی سرا چگل داتگ انت مردمانی گساں دور کتگ ءُ مردم آوار جتگ انت بلے ھچ وڈیں ریاستی ادارھاں آ نداشتگ انت ۔
آئی ءَ سال 2016 ءَ سول ھسپتال شال ءِ ارش ءِ درگت ءَ گوشتگ کہ ما ھما وھد ءَ چمن ءَ بگر تاں پشین ءَ بازیں دمگے ءَ شتگ ءُ مھلوک ءَ گوں یکجاھی لوٹ کتگ پرچا کہ داں مردم یکمشت ءُ یکجاہ مہ بنت گڈا کس پھریز نہ انت ۔
آئی ءَ گوشتگ کہ مروچی جاور ھما جاہ ءَ سر انت کہ جون کنٹینران انت بلے پدا ھم بلوچستان ھزاراں ھنچیں مردم ھست کہ آیاں وتی دوستیگیں مردمانی جون ھم نہ رستگ انت۔ آئی ءَ گوشتگ من وت ھم ھما مردماں ھوار انت کہ چل ءُ پنچ سالیں مناں ناں وتی برات ءِ جون رستگ ءُ ناکہ من آ کوپگ داتگ ۔
آئی ءَ گوشتگ کہ مھلوک بس وتی ھکانی لوٹ ءَ کنگ ءَ انت اگاں راستی گوشتگ ءُ وتی ھک ءِ پچ گرگ جرم بہ بیت گڈا چشیں ریاست دیراں نہ مان انت ۔ گوستانک ءَ ہلاکو ءُ ہٹلر ءِ وڈیں ھاکمانی ریاست ھم نہ مان اتگ انت ۔
آئی ءَ گوشتگ کہ زھرشانی ھلاس کنگ ءُ وتی لوٹاں چہ دزکشی جھد کنگ بیت بلے شمارا وتی موقف سرا اوشتگی انت ۔ آئی سرکار ءِ سرا نگد کتگ ءُ گوشتگ کہ جھان ءِ تہ ءَ وھدیکہ یک مردمے ءِ کوش ءِ سرا وزیر استعفی دیاں بلے بلوچستان ءَ بازیں جان ءِ زیا بوتگ بلے ھاکمانی گوش ءَ مور ءِ نہ وارت ۔
تران ءِ گڈسر ءَ اکتر جان مینگل ءَ گوشتگ کہ بی این پی ءَ اسلام آباد ءَ ھم ہنہ اوڑک ءُ زیارت ایندگہ وئیلانی درگت ءَتوار چست کتگ ءُ ادا نندانک ءَ نشتگیں مردم دیمتر ءِ ھم ھر وڈیں شئور ءُ سلاہ ءِ کن انت گڈا مئے پاٹی آیانی گوم ءَ ھمکوپگی ءَ اوشت ایت ۔