جیونی ءَ ھشت ءَ روچ ءَ چہ گوادر ءُ بلوچستان ءِ دگہ دمگاں چہ جھلی اِھوال بند، پنجاہ ءَ چہ گیش ورنا زورانسری بیگواہ

بلوچستان ءِ تیاب دپی شھر گوادر ءِ دمگ جیونی ءَ گوستگیں ھشت روچ ءَ چہ جھلی زمینی اِھوال بند بیگ سوب ءَ ھمکروچی زند سکا سانمندی ءِ ھال اِنت-

دمگی مردم ءِ رِد ءَ شھر ءَ گوادر ءُ بلوچستان ءِ دگہ دمگاں چہ جھلی اِھوال مھدود بیگ ءِ آسر ءَ توژگ ،دوا درمان ءُ دگہ بُنکی اژدری ءِ سر بیگ سک سانمند بیتگ، وھدے کہ نادُراھاں پہ وھد الاج ءِ واستا دومی شھراں تاں پُجّارینگ ھم سکا دلسیاھی ءِ دپمپانی اِنت-

دمگی آبادی ءِ گوشگ اِنت انگیں اے وئیل ءَ پد سرجمیں دمگ انچیں گامگیجی ءِ دیمپانی اِنت کہ آئی ءِ اسرات ھزرانی لَس شھریانی سر ءَ کپگ ءَ اِنت- کھول ءِ رِد ءَ پنجاہ ءَ چہ گیش ورناہ آوار جتگ، وھدے کہ لھتے دمگی مردمانی گوشگ اِنت کہ کماشیں مردم ھم ھوار اَنت –

شھریانی گوشگ اِنت لھتے مردمانی گامگیج ءِ زمہ واری سرجمیں شھر یا دمگ سر ءَ جنگ نہ بیتگ- آئی ءِ رِد ءَ ھزرانی شھریانی سُر ءُ پُر روزگار ، توژگ ءُ الاج وڑیں بُنکی آسراتی ءَ چہ زبھر کنگ ناں تھنا انسانی اڑ ءُ جنجالانی گیشی کنت بلکیں راج تُرس بے دلجمی ءُ ناگیگی ھم ودی کنت-

شھریاں وفاقی ءُ صوبائی حکومت، انسانی ھکانی ادارھاں، گچین راجی نمائندگ ءُ ھمگرنچیں واکدار ءَ چہ لوٹ کتگ کہ جیونی ءَ ھستیں جاوراں ھال ءِ زوت گامگیج زیرگ بہ بیت، شھریاں آزاتیں سُر ءُ پُر پچ کنگ بہ بنت، توژگ ءُ دوا درمان ءِ آسراتی دیگ دلجمی دیگ بہ بیت ءُ آوار جنگ بیتگیں مردمانی درگت ءَ کھولاں کانودی دروشم ءِ رِد ءَ سرپدی بدے اَنت-

زانگ بہ بیت سے جولائی ءَ پانوان ءَ پاکستان کوسٹ گارڈز ءِ بُنجل سر ءَ بلوچ لبریشن آرمی ءِ مجید بریگیڈ ءِ وتکشتراک اُرش ءَ پد پاکستانی پوج ءَ دمگی آبادی ءِ ھلاپ ءَ کاروائی تُرند کتگ اَنت-