ھُزدار ءَ ایف ایس سی نودربر کامران بلوچ ڈیتھ اسکواڈ نشانگ کتگ ءُ کُشتگ- بی وائی سی

بلوچ یکجھتی کمیٹی ءَ گْوشتگ کہ کامران بلوچ ھُزدار ءِ دمگ چہ مولہ ءَ سیادی داروکیں بیست سالی ئیں ایف ایس سی نودربرے بیتگ، ھشت جولائی 2026 ءَ کامران بلوچ ھُزدار ءَ ڈیتھ اسکواڈ ءَ نشانگ کتگ کُشتگ-

آئی ءَ گْوشتگ کہ کامران بلوچ دردناکیں کوش بلوچ راج ءِ ھلاپ ءَ برجاہ زوراکی ءُ بلوچستان ناگیگیں انسانی ھکانی زوراکیانی یک دگہ بژنیں یاتے-

بی وائی سی ءِ رِد ءَ بلوچستان ءَ بلوچ راج ءِ ھلاپ ءَ چُکچینی ءِ دْرچ ھرچ گوزوکیں روچ ءِ ھمراھی ءَ گیش بوان اِنت، چُشیں روچے ھم نہ گوز اِیت کہ وھدے یک بلوچے کُشگ مہ بیتگ- کھول ھر وھد ءَ وتی دوستناکانی واتری ءِ ودار کنگ جاہ ءَ آئی ءِ لاش دزگرگ ءَ لاچار کنگ بیتگ- تُرس ، گم ءُ گستائی ھزارانی بلوچ کھولانی ھمکروچ راستی جوڑ بیتگ-

آئی ءَ دیمتر ءَ گْوشتگ کہ اگاں بلوچستان ءَ انساپ ءُ کانود ءِ ھمکرانی بیت گُڑا اے وڑ زوراکی برجاہ نہ بیتگ اَت – ٹارگٹ کلنگ د، درکانودی کوش، دروگیں میڑ ءُ زورانسری آوار جنی ءَ انچیں تُرسیں چاگردے جوڑ کتگ کہ اود ءَ ھچ بلوچ وت ءَ مُھر سرپد نہ بیتگ- وھدے کجام ھما چُک چہ لوگ ءَ در کئیت ءُ آئی ءِ کھول ءَ اے تُرس بیت کہ آ زندگی ءَ واتر کئیت یا تھنا آئی ءِ لاش لوگ ءَ سر کنگ بیت-

بلوچ یکجھتی کمیٹی ءَ میان اُستمانی مردم، اکوام متھدہ، میان استمانی انسانی ھکانی گلاں ءُ انساپ ءُ انسانی ھکانی ھاتر ءَ توار چست کنوکیں سرجمیں ادارھاں چہ دزبندی کتگ کہ آ بلوچستان ءَ انسانی ھکانی سنگین ءِ جاوراں زوت گامگیج بزور اَنت- ھچ کس مُھر نہ اِنت، ناں نودربر، ناں استاد، ناں ڈاکٹر، ناں مزدور ءُ ناں لس شھری – مردم یکشل ءَ زورانسری آوار جنی، ٹارگٹ کلنگ ءُ دگہ سنگین ءِ انسانی ھکانی ھلاپ ورزیانی دیمپانی کنگ کپگ ءَ اِنت، وھدے کہ آیاں انساپ ءُ پسہ نہ رس اِیت-