بلوچستان ءِ دمگ چہ پنجگور ءَ زورانسری بیگواھی ءِ دگہ یک کیسے دیم ءَ اتکگ، یونیورسٹی ءِ نودربرے پاکستانی لشکر ءَ آوار جتگ ءُ بیگواہ کتگ۔
دمگی مردمانی رد ءَ پنجگور ءِ شھر ءِ یونیورسٹی ءِ کش ءُ گوراں پاکستانی لشکر ءَ یک ورنایے نودربرے دزگیر کتگ ءُ نودربر ءِ پجار پنجگور پروم ءِ نندوکیں زاہد ء خدا دوست ءِ نام ءَ بوتگ۔
دمگی مردماں گْوشتگ کہ زاہد چہ یونیورسٹی ءِ کش ءُ گور ءَ دزگیر کنگ ءَ پد ناشناسیں جاھے ءَ برگ بوتگ، وھدے کہ چہ ایشی ءَ پد آئی ءِ بابت ءَ ھچ وڑیں ھال ءُ اھوال سر نہ بیتگ۔
زانگ بہ بیت کہ اے ششمی کیس اِنت کہ گوستگیں روچ ءَ بیگواھی ءِ کنگ رپورٹ بوتگ۔ ایشی ءَ چہ پیسر 15 جون ءَ پنجگور ءِ دمگ چہ کھدا حکیم بازار ءَ پاکستانی لشکر ءَ سعداللہ غلام جان ءُ زیاب ء کھدا کریم جان دزگیر کتگ اَنت۔
ھمے وڑ ءَ گوستگیں سھب ءَ دگہ سئے مردم عزیز ء حسن ، صدیق ء جان مھمد ءُ لطیف ء حاجی سلیم چہ وتی لوگاں آوار جنگ بوتگ اَنت۔