ڈیرہ بگٹی، شال دو ورنا زورانسری بیگواہ کتگ اَنت

بلوچستان ءِ بُنجاھی شھر چہ شال ءُ ڈیرہ بگٹی ءَ دو ورنا زورانسری آوار جنی ءِ ھال سر بیتگ، آ پاکستانی پوج ءُ سی ٹی ڈی کارندھاں آوار جنگ ءُ پد بیگواہ کتگ اَنت-

گیشیں ھالانی رِد ءَ ڈیرہ بگٹی ءِ تھسیل سوئی ءِ دمگ چہ بگٹی کالونی بازار ءَ سی ٹی ڈی کارندھاں یک ورنایے آوار جنگ ءَ پد ناشناسیں جاھے ءَ برتگ-

بیگواہ کنگ بیتگیں ورنا ءِ پجّار رزاق ء شاہ میر بگٹی ءِ نام ءَ چہ بیتگ- کھول ءِ رِد ءَ رزاق سی ٹی ڈی کارندھاں دزگیر کتگ، بلے آئی ءِ درگت ءَ ھچ وڑیں سرپدی نیست-

دومی نیمگ ءَ شال ءِ دمگ سریاب دگ، کلی حبیب فیض آباد ءَ ھم یک نودربرے زورانسری آوار جنی ءِ ھال دیم ءَ اَتکگ-

بیگواہ ورنا ءِ پجّار عرفان اللہ ء عبدالجبار نام ءَ چہ بیتگ، آئی ءِ اُمر بیست دو سال گوشگ بیگ ءَ اِنت – ھالانی رِد ءَ آ شش مئی 2026 ءِ شپ ءَ کساس سے ءَ سی ٹی ڈی کارندھاں بیڑبرتگ ءُ آوار جتگ-