پنجاب : پروفیسر غمخوار ھیات ءِ یات ءَ مراگش برجم دارگ بیتگ

بلوچ اسٹوڈنٹ کونسل پنجاب یونیورسٹی ءِ نیمگ ءَ چہ براھوئی زُبان ءِ نامی ئیں ادیب ءُ شائر پروفیسر غمخوار حیات ءِ یات ءَ یک ھمدردی مراگشے برجم داشتگ، اود ءَ نودربراں براھوئی ادب ءُ زبان ءِ درگت ءَ آئی ءِ ھزمتانی ستک شانی ندر کنان ءَ آئی ءِ کوش بلوچ زانت ءِ سر ءَ اُرش گوشتگ-

ترانکاراں گوشتگ کہ پروفیسر غمخوار حیات ءَ براھوئی زبان ءُ ادب ءِ ھاتر ءَ شپ ءُ روچ جُھد کتگ بازیں کتاب نبشتہ کتگ ءُ رجانک کتگ اَنت، ءُ زبان ءِ ھزمت ءَ کشگ بیتگ-

زانگ بہ بیت پروفیسر غمخوار حیات زی نوشکی ءِ دمگ کلی مینگل ءَ ریاستی پلامرزی سلاہ بندیں ٹولی ڈیتھ اسکواڈ ءَ تیرگواری ءَ کتگ ءُ کشتگ-

پروفیسر غمخوار حیات براھوئی زبان ءِ نامی ئیں شائر، ادیب، رجانکار کسّہ نویسکار ءُ انشائیہ نویسے بیتگ- آئی ءَ جتاجتائیں لبزانک ءَ جوانیں وڑے ھزمت کتگ ءُ کساس بیست کتابانی نبشتہ کار بیتگ- آ راسکوہ ادبی دیوان ءُ اوتان کلچر اکیڈمی ءِ سروکاں ھوار بیتگ-

آئی ءِ کوش ءِ سر ءَ سیاسی، چاگردی، ادبی پڑ ءِ مردماں سک گم ءُ بژن ءِ درشانی کتگ-

جتاجتائیں پارٹیانی گوشگ اِنت کہ غمخوار حیات ءِ شھیدی ءَ چہ ناں تھنا براھوئی ادب بلکیں الم ءُ زانت ءِ جھان ھم ءَ بے کساس تاوان رس اِتگ-