چاگی ءَ سڑک ءِ جوڑ کنوکیں کمپنی ءِ سر ءَ اُرش، مادی کشوکیں کمپنی ءِ آوار جنگ بوتگیں سئے مردمانی لاش دست کپتگ انت۔
بلوچستان ءِ دمگ چاگی ءَ ھالانی رد ءَ ناشناسیں سلاہ بندیں مردماں اے اُرش ءَ سڑک ءِ جوڑ کنگ ءِ کار ءَ ھواریں گاڑی نشانگ جوڑ کتگ اَنت وھدے کہ پد ءَ چہ چھتر ءِ دمگ ءَ مادی درگیجگ ءِ کمپنی ایم سی سی ءَ گوں سیادی داروکیں سئے مردمانی تیر ءِ آماچیں لاش دزکپتگ اَنت۔
ھالانی رد ءَ لھتیں روچ پیسر مادی درگیجوکیں کمپنی ءِ اے باسک ناشناسیں مردماں آوار جتگ انت کہ مرچی آہانی لاش شھدگ ءِ کش ءَ دست کپتگ انت۔
لاشانی پجار سرگودھا ءِ نندوکیں زہیر احمد، سرگودھا ءِ نندوکیں وسیم ءُ چنیوٹ ءِ نندوکیں محمد افضل ءِ ناماں بوتگ انت۔ اے سئیں باسکانی سیادی گوں پنجاب ءَ گشگ بیتگ۔
دومی نیمگ ءَ بنشون ءِ گشگ اِنت کہ چاگی ءَ ناشناسیں سلاہ بندیں مردماں سڑک ءِ جوڑ کنگ ءِ منسوبگ ءِ سر ءَ کار کنوکیں گاڑی ھم نشانگ جوڑ کتگ اَنت۔ اے وئیل ءَ پد دمگ ءَ ترس ءُ بیم ءِ آماچ بوتگ ءُ قانون سازگار کنوکیں اداراھاں پٹ ءُ پول بندات کتگ۔