بلوچستان ءَ جتاجتائیں دمگاں بیتگیں اُرشانی زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں ھپدہ مئی 2026 ءِ مند ءِ دمگ سوراپ سیمسر سر ءَ برجاہ پاکستانی پوج ءِ یک چیک پوسٹے سک نزیک ءَ چہ نشانگ کتگ- چریشی ءِ آسر ءَ ڈن ءَ ڈیوٹی سر ءَ ساڑی سے کارندہ جاہ پہ جاھی مرتگ اَنت- اے بنداتی اُرش ءَ زوت شرمچاراں سنگرانی تہ ءَ ساڑی دگہ کارندھانی سر ءَ مزنیں ءُ وتکاریں سلاھاں چہ اُرش کتگ، چریشی ءَ چہ چیک پوسٹ پھازی بُن ھِشت ءَ تاوان رس اِتگ-

جارکش ءَ گوشتگ کہ کاروائی ءَ پد پوج ءَ ڈرون بالگرداں چہ سرمچارانی رندگیری کتگ، بلے سرمچاراں چیرجنگی رپکاں چہ پہ سلامتی دراھگ ءَ سوبمند بیتگ اَنت-

جارکش ءَ گْوشتگ کہ سرمچاراں پانزدہ مئی 2026 جھاؤ ءِ دمگ ڈولیجی ءَ برجاہ زورگریں پاکستانی پوج ءِ پھازوکی چوکی سر ءَ مزنیں ءُ وتکاریں سلاھاں چہ اُرش کتگ، چریشی ءِ آسر ءَ دُژمنیں پوج ءَ جانی ءُ مالی تاوان چست کنگ کپتگ- کاروائی ءِ میان ءَ پروش وارتگیں دُژمن ءَ سرمچارانی سنگرانی نشانگ کنگ ءِ ھاتر ءَ کواڈ کاپٹر کارمرز کتگ، چریشی ءَ سرمچاراں زوت پسھی کاروائی کنان ءَ جتگ ءُ دور داتگ-

جارکش ءَ گْوشتگ کہ سرمچاراں سیزدہ مئی 2026 ءَ کیچ ءِ دمگ شاپک ءَ برجاہ زورگریں پاکستانی پوج ءِ بُنجاھی بُنجل ءُ آئی ءِ پھازوکی چوکیانی سر ءَ یک یکجاھیں اُرشے کتگ- سرمچاراں جتاجتائیں ٹولیاں نوکیں، مزنیں ءُ وتکاریں سلاھاں چہ دُژمن ءِ بُنجل ءُ چوکیانی بازیں نیمگاں چہ یکیں وھد ءَ نشانگ کتگ- اے کاروائی ءِ آسر ءَ زورگریں پوج ءِ بُنجاھی بُنجل ءُ ڈن چوکیاں سک تاوان رس اِتگ، وھدے کہ اود ءَ ساڑی کارندھاں جانی ءُ مالی تاوان چست کنگ کپتگ-

جارکش ءَ گوشتگ کہ مئے سرمچاراں بیست نُھ اپریل 2026 ءَ ھب ءِ دمگ دُریجی ءَ چاریگی سسٹم ءَ پٹیں ریاستی ھال اھوالی ٹاور نشانگ کتگ اود ءَ ساڑی مشینری مانداشتگ اَنت- سرمچاراں اے اُرش ءِ آسر ءَ ھمے ھند سر ءَ برجاہ دُژمن ءِ ھال اھوالی ٹاور ءَ پٹّیں سرجمیں سسٹم ءُ آئی ءِ مشینری ءَ سرجمی ءَ تباہ بوتگ اَنت-

گُڈی ءَ جارکش ءَ گوشتگ کہ اے۔سرجمیں اُرشانی زمہ واری ءَ مئے گل منّ اِیت-