بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں 25 اپریل ءَ چہ سے مئی ءَ میان ءَ یازدہ کاروائی کتگ، آیانی تہ ءَ زورگریں پوج ءِ یازدہ کارندہ کشتگ اَنت – اے اُرشاں زورگریں پاکستانی پوج ءِ مڈی بروکیں گاڑی ءُ چریک نشانگ کتگ اَنت – چار آئی ای ڈی اُرشاں زورگریں پوج مزنیں کچے ءَ جانی ءُ مال تاوان ءِ دیمپانی کتگ، وھدے کہ ملٹری انٹیلی جنس ءِ سے کارندہ آوار جتگ- زورگریں پوج ءِ گوما میڑ ءَ بی ایل اے ءِ سے سرمچار، اسد پنّام ءِ بابا درویش، شکیل الرحمان پنّام ءِ شیخ عطاء ءُ شیھک پنّام ءِ صدیق شھید بیتگ اَنت-
جارکش ءَ گوشتگ نوشکی ءَ تاڑیز ھند ءِ سر ءَ زورگریں پاکستانی پوج ءَ گوں میڑاں بلوچ لبریشن آرمی ءِ سے سرمچار ،اسد جمالدینی پنّام ءِ بابا درویش، شکیل الرحمان بنگلزئی پنّام ءِ شیخ عطاء ءُ شیھک مینگل پنّام ءِ صدیق شھید بیتگ اَنت-
جارکش ءَ 24 اپریل ءَ مستونگ دشت ءَ پاکستانی چیریں ادارھانی ایم آئی (ملٹری انٹیلی جنس ) ءِ سے کارندہ ھما وھد ءَ دزگیر کتگ اَنت وھدے آیاں دروشم مٹ کتگ دمگ ءَ سُر ءُ پُر کنگ ءَ بیتگ اَنت- کارندھاں چہ ٹریسنگ ڈیوائسز دزکپتگ اَنت، وھدے کہ دزگیریں کارندھاں گیشیں پٹ ءُ پول برجاہ ءَ اِنت-
جارکش ءَ دیمتر ءَ گوشتگ 26 اپریل ءَ سرمچاراں پنجگور چیدگی بُنجاھی دگ سر ءَ بازیں کلاکاں تاں ناکہ بندی کتگ، اے میان ءَ دوازدہ ٹرالر گاڑیاں ٹائر برسٹ(ناکارہ) کتگ ڈرائیور کڈن کنگ ءَ پد یل داتگ اَنت-
جارکش ءَ گوشتگ 27 اپریل ءَ پنجگور ءَ چیدگی دگ سر ءَ سرمچاراں یکرندے پد ءَ ناکہ بندی کتگ یازدہ ٹرالر گاڑیانی ٹائر تراکینتگ اَنت ءُ ڈرائیور گُڈی رند ءَ کڈن کتگ ءُ پد ءَ یل داتگ اَنت-
جارکش ءَ گوشتگ 28 اپریل ءَ سرمچاراں دالبندین ءَ بند ساچی شرکت ءِ کارندہ کوارٹر ءِ سر ءَ دستی بمب ءَ چہ اُرش کتگ، چریشی ءَ شرکت ءِ پنچ کارندہ ٹپی بیتگ اَنت-
جارکش ءَ گوشتگ پنجگور پروم : گومازی ءِ ھند سر ءَ سرمچاراں پاکستانی پوج ءِ کارندھانی سر ءَ ھما وھد ءَ اُرش کتگ وھدے آ کارواناں پھازوک دیگ ءِ ھاتر ءَ چیک پوسٹ سر ءَ سر بیتگ اَنت، اُرش ءَ دو کارندہ جاہ پہ جاھی مرتگ اَنت-
جارکش ءَ دیمتر ءَ گوشتگ 29 اپریل ءَ کلات شھر ءَ پاکستانی پوج ءِ بُنجاھی بُنجل ءِ سر ءَ سرمچاراں گرنیڈ لانچر ءَ چہ بازیں گولھے آس داتگ دُژمن ءَ جانی ءُ مالی تاوان داتگ-
جارکش ءَ گوشتگ یک مئی ءَ دالبندین ءَ چل گزی ءَ سرمچاراں یک لیزے ءِ سر ءَ دستیگ کتگ سیکیورٹی کارندھانی سلاہ ءُ موٹر سائیکل برتگ اَنت-
جارکش ءَ گوشتگ کہ 2 مئی ءَ پنجگور چیدگی ءِ دمگ ءَ سرمچاراں زورگریں پوج ءِ گاڑی ریموٹ کنٹرول آئی ای ڈی اُرش ءَ نشانگ کتگ اَنت- تراک ءَ زورگریں پوج ءِ پنچ کارندہ مرتگ ءُ دو سک ٹپی بیتگ اَنت، وھدے گاڑی سرجمی ءَ تباہ بیتگ-
جارکش ءَ گوشتگ کہ پسنی شادی کور ھند سر ءَ سرمچاراں زورگریں پوج ءِ گاڑی آئی ای ڈی اُرش ءَ نشانگ کتگ ءُ تباہ کتگ – گاڑی ءَ سوار چار کارندہ جاہ پہ جاھی مرتگ ءُ دگہ چار سک ٹپی بیتگ اَنت-
جارکش ءَ گوشتگ کہ دکی لونی ءَ سرمچاراں مڈی بروکیں گاڑیانی پھازوکی ءَ ساڑی، زورگریں پوج ءِ جوڑ کتگیں سلاہ بندیں ٹولی ءِ کارندہ ریموٹ کنٹرول آئی ای ڈی اُرش ءَ نشانگ کتگ اَنت – تراک ءَ موٹر سائیکل ءِ سر ءَ سوار دو کارندہ سک ٹپی بیتگ اَنت-
جارکش ءَ گوشتگ کہ 3 مئی ھاران المرک ءَ زورگریں پاکستانی پوج ءِ بمب ڈسپوزل اسکواڈ ءِ کارندہ سرمچاراں ھما وھد ءَ آئی ای ڈی اُرش ءَ نشانگ کتگ اَنت وھدے آ زورگریں پوج ءِ زوراکی ءِ نیئت ءَ چہ ‘کلیئرنس’ ءَ دلگوش بیتگ اَنت- تراک ءَ سے کارندہ ٹپی بیتگ اَنت-
جارکش ءَ گوشتگ بلوچ لبریشن آرمی اے سرجمیں کاروائیانی زمہ واری ءَ منّ اِیت ءُ اے اِھد کنت کہ ماتیں وتن ءِ آجوئی ءَ تاں مئے اُرش دُژمن ءِ سر ءَ گوں تُرندی ءَ برجاہ بنت-
جارکش ءَ گوشتگ کہ نوشکی ءِ میڑ ءَ زورگریں پوج ءَ گوں دلیری ءَ جنگ کنان ءَ نمیران بیتگیں بی ایل اے ءِ تمردیں سدمچار ،اسد جمالدینی پنّام ءِ بابا درویش ،شکیل الرحمان پنّام ءِ شیخ عطاء ءُ شھیک مینگل پنّام ءِ صدیق ءَ آیانی بے مسالیں دیمونی ءُ دلیری ءِ سر ءَ سھرچکیں دروت ندر کن ایں – اے شھیداں وتی ھون ءَ چہ گھگیری ءِ چراگ رُژن ءَ کتگ، آ زرمبشت آجوئی ءِ ھاتر ءَ رُژنائی کشک بیت- بلوچ راج ءِ رکینگ ءُ وتواجھی ءِ اے جنگ وتی شھیدانی رندگیری ءَ روان زوراک ءِ سرجمی ءَ دراھگ ءَ تاں برجاہ بنت-