بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ 15 اپریل ءَ بگر تاں 25 اپریل ءِ میاں ءَ سرجمیں بلوچستان ءَ 27 ارش کتگ انت ، کہ آیانی تہ ءَ آئی ای ڈی ، ڈرون اُرشاں ھوار سنگر گپتگیں اُرش ھوار انت ۔ اے اُرشاں زورگریں پوج ءِ 42 کارمند مرتگ ءُ بازینے زدگ بوتگ انت وھدیکہ سرمچاراں یک پوجی کارمندے زندھاتی دزگیر کتگ ۔ سرمچاراں پوج ءِ پانگس گپتگ ءُ سلاہ دستیگ کتگ انت ۔ دژمن ءِ سر ءَ بوتگیں اُرشاں چہ گل ءِ سنگت شاہ کرم ملازئی پنام ءِ ساچان ، گھرام بلوچ پنام ءِ کمبر ، آسم شاھوانی پنام ءِ رودین نمیران بوتگ انت.
جارکش ءَ سرجمیں ھال داتگ ءُ گوشتگ کہ 15 اپریل ءَ بی ایل اے ءِ سرمچاراں ھزدار ءِ دمگ زھری سوہندہ ءَ زورگریں پوج پیادگ روکیں کارمندانی سر ءَ ریموٹ کنٹرول اُرشے کتگ چریشی ءَ سے کارمند ھما دمان ءَ مرتگ انت ءُ پد ءَ رند ءَ پوج ءِ کاروان ءَ دیم ءَ کنزگ ءِ جھد کتگ کہ سرمچاراں سنگر گپتگ ءُ آیانی سر ءَ اُرش کتگ کہ چریشی ءَ پوج ءِ ھپت کارمند مرتگ انت ءُ بازینے زدگ بوتگ انت کہ بے دلیں پوج ءَ وتی کارمندانی جون ، گاڑی ءُ پرپٹ یل داتگ ءُ تتکگ انت ۔ دومی روچ ءَ بے دلیں پوج ءَ کشندہ ٹولی ءِ کارمندانی ھمرائی ءَ لس مھلوک ءِ سر ءَ بیڑ برتگ ءُ زوراکی کنان ءَ مردم بندیگ کتگ انت ءُ پد ءَ آیانی تہ ءَ یازدہ مردم تیر باران کتگ ءُ نمیران کتگ انت ۔
جارکش ءَ گوشتگ 16 اپریل ءَ ھاران المرک ءَ سرمچاراں زورگریں پوج ءِ سر ءَ ھما وھد ءَ سنگر گپتگ ءُ آئی ءِ سر ءَ آئی ای ڈی اُرشے کتگ وھدیکہ آ دمگ ءَ لشکر کشی ءَ پہ آیگ ءَ بوتگ انت ، چہ اُرش ءِ سوب ءَ پوج پدکنزگ ءَ لاچار بوتگ وھدیکہ اے اُرشاں پوج ءِ کم چہ کم ھپت کارمند مرتگ ءُ دو گاڑی سرجمی ءَ تباہ بوتگ انت ، ھمے روچ ءَ سرمچاراں شال ایگل اسکواڈ ءِ سر ءَ بمب اُرشے کتگ چریشی ءَ دو پرپٹ سوار اُرش ءِ زد ءَ اتکگ ءُ زدگ بوتگ انت ۔
آئی ءَ گوشتگ 17 اپریل ءَ سرمچاراں زورگریں پوج ءِ کارمند شیر افضل زرگون ھما وھد ءَ نشانگ کتگ وھدیکہ آ شپ ءِ وھد ءَ پرپٹ ءِ سر ءَ رؤگ ءَ بوتگ ۔ اے مرد دکی ءَ کشندہ ٹولی ءِ سروکی ءَ کنگ ءَ انت ۔ اے ٹولی ءِ دمگ ءِ تہ ءَ ورنایانی زورانسری آوار جنی چادر ءُ چاردیوالی ءِ لگتمالی ءُ پوجی زوراکیاں ھوار انت ۔ ھمے روچ ءَ سرمچاراں کشندہ ٹولی ءِ سروک ٹکری سمالانی ءُ سمد ءِ کاروان ءِ سر ءَ ھم ماں جر ءُ ممائی ءَ اُرش کتگ ۔ پد ءَ رند ءَ آوکیں پوج ءِ سر ءَ ھم اُرش کتگ اے ارشاں زورگریں پوج ءُ کشندہ ٹولی ءِ بازیں کارمندے مرتگ ءُ زدگ بوتگ انت.
جارکش ءَ گوشتگ کہ 18 اپریل ءَ زورگریں پوج ھرنائی ءُ شھرگ ءَ پہ لشکر کشی ءِ نیت ءَ آیگ ءَ بوتگ کہ سرمچاراں آیانی سر ءَ اُرش کتگ چریشی ءَ زورگریں پوج ءِ بازیں کارمندے مرتگ ءُ زدگ بوتگ انت ۔ وھدیکہ اے میان ءَ یک کارمندے عبدالحلیم ءِ شفیع محمد ( آرمی نمبر 3578541) دزگیر کتگ ، پوجی کارمند مارا گون انت ءُ آئی ءِ جست برجاہ انت ۔
آئی ءَ دیمتر ءَ گوشتگ کہ جھل مگسی ءَ سرمچاراں شوران لیویز پانگس دستیگ کتگ ءُ سلاہ گپتگ انت ، سرمچارانی دگہ ٹولی ءَ زورگیریں پوج پلامرزیں سلاہ بندیں ٹولی ءِ پانگس کنٹرول کتگ ءُ سلاہ دستیگ کتگ ءُ آ مانداشتگ ۔ زامران ءِ دمگ نوانو ءَ زورگریں پوج ءِ دو راشن بروکیں گاڑی گپتگ ءُ مانداشتگ انت ، پنجگور ھدابادان ءَ سرمچاراں شپ ءِ وھد ءَ زورگریں پوج ءِ گاڑیانی سر ءَ اُرش کتگ اُرش ءَ دشمن ءِ دو کارمند مرتگ انت ۔
وھدیکہ 19 اپریل ءَ زامران مومیچ ءَ زورگریں پاکستانی پوج ءِ گوم ءَ میڑ ءَ سنگت شاہ کرم ملازئی پنام ءِ ساچان نمیران بوتگ ۔ مستونگ دشت ءَ کمبیل ھند ءَ سرمچارانی اُرش ءَ زورگریں پوج ءِ چار کارمند مرتگ انت ءُ دگہ ھپت زدگ بوتگ انت ۔ زورگریں پوج ءِ سر ءَ سرمچاراں ھما وھد ءَ اُرش کتگ وھدیکہ آ لشکر کشی ءِ نیت ءَ دمگ ءَ آیگ ءَ بوتگ انت ۔ سرمچاراں شپ ءِ وھد ءَ زورگریں پوج ءِ سر ءَ دگہ ھم اُرشے کتگ چریشی ءَ زورگریں پوج ءِ دگہ پنچ کارمند مرتگ انت ءُ بازینے زدگ بوتگ انت ۔ زورگریں ءَ وتی مرتگیں کارمندانی جون ءُ تباہ بوتگیں گاڑی پشت ءَ یل داتگ ءُ تتکگ انت۔
جارکش ءَ گوشتگ کہ ھمے روچ ءَ سرمچاراں دشت کنڈ مسوری ءَ زورگریں پوج ءِ بنجل ءِ سر ءَ اُرش کتگ وھدیکہ ھمے روچ ءَ بیگاھ ءَ شال ڈغاری کراس ءَ زورگریں پوج ءِ گاڑیانی سر ءَ اُرش کتگ چریشی ءَ زورگریں پوج ءِ سے کارمند مرتگ انت آیانی گاڑی تباہ بوتگ ، کمبیلا ءَ میڑ ءَ سنگت عاصم شاہوانی پنام ءِ رودین نمیران بوتگ ۔
درشان ءِ تہ ءَ گوشگ بوتگ 22 اپریل ءَ سرمچاراں نوشکی زرین جنگل ءَ سی ٹی ڈی کاروان ءِ سر ءَ اُرش کتگ ۔ دالبندیں خزانگی ءُ کرودک ءَ لیویز فورس ءِ دو پانگس دستیگ کتگ ءُ سلاہ گپتگ انت ۔
جارکش ءَ گوشتگ کہ مستونگ گرکینہ کوتل ءَ بی ایل اے ءِ برزی ڈرون وارفیئر یونٹ قھر ءَ زورگریں پاکستانی پوج ءِ پانگس ءِ سر ءَ ڈرون اُرشے کتگ اُرش ءَ زورگریں پوج ءِ دو کارمند مرتگ ءُ چار زدگ بوتگ انت وھدیکہ دژمن ءَ مالی تاوانانی دیمپانی کنگ کپتگ۔
24 اپریل ءَ سرمچاراں شال ، ہنہ اورڑک ءِ نزیک ءَ ٹیل ءُ گیس ءِ کمپنی ءِ سر ءَ اُرش کتگ اود ءَ گرانھادیں مشینری مانداشتگ انت. وھدیکہ سوراب ءَ سرمچاراں پوج ءِ سر ءَ آئی ای ڈی اُرشے کتگ ءُ پد ءَ سنگر گپتگ ءُ ایانی سر ءَ اُرشے کتگ چریشی ءَ پوج ءِ چار کارمند مرتگ انت وھدیکہ بازینے زدگ بوتگ انت ۔
جارکش ءَ گوشتگ کہ 25 اپریل ءَ شمبے ءِ شپ ءَ کلات زاوہ ءَ زورگریں پاکستانی پوج ءِ کارمندانی سر ءَ ھما وھد ءَ آئی ای ڈی اُرشے کتگ وھدیکہ آ آئی ءَ ناکارہ کنگ ءِ کوشست ءَ بوتگ انت تراک ءَ دو مرتگ ءُ سے زدگ بوتگ انت ، ھمے شپ ءَ دالبندین یک مچ ءَ سرمچاراں پولیس تانہ ءُ ریسٹ ہاؤس ءِ سر ءَ کنٹرول کتگ ءُ کارمندانی سلاہ دستیگ کتگ انت پد ءَ رند ءَ ماڑی ءُ اود ءَ اوشتوکیں گاڑی ءُ مشینری مانداشتگ انت ۔
گڈسر ءَ جارکش ءَ گوشتگ کہ بی ایل اے اے ارشانی میان ءَ پہ مادریں ڈیھ نمیران بوتگیں دلیریں سرمچار شاہ کرم پنام ساچان ، گھرام پنام ءِ کمبر ءُ عاصم شاھوانی پنام ءِ رودین ءَ دروت ندر کنت ۔ اے نمیرانیں سراں ایردستی زمزیلانی پروشگ ءُ بلوچ راج ءِ رکینگ ءِ ھاتر ءَ دژمن پوج ءِ گوم ءَ دیم پہ دیمی میڑ داتگ ءُ وتی جانانی دیمھونی داتگ ۔ آیانی رتکگیں ھون ھمے کول ءِ اَھد ءَ کن انت کہ بلوچ راجی زرمبشت ھما ھد ءَ سر انت کہ اود ءَ سرڈگار ءَ گوں مھر دیم ءَ مرگ ءِ ترس ھچ ءِ نہ انت ۔ بی ایل اے اے کول ءَ کنت کہ نمیران بوتگیں سرانی ھون مپت ءَ نہ رو انت آیانی پشت کپتگیں مشن ءَ بلوچستان ءِ آجوئی زورگریں درآیگ ءَ تاں منزل ءَ سرکنت اے منگھیں بلوچ پرزندانی دیمھونی بلوچ راجدپتر ءِ پیشانی ءِ تلاہ ءُ پدریچ ءِ ھاتر ءَ رژنائیں چراگ انت ۔