نوشکی ءَ چہ ھمگرنچ دمگ مستونگ ءِ ھند گرگینہ ءَ پاکستانی پوج ءِ بُنجل ڈرون اُرش ءَ نشانگ کتگ-
پوج بُنجل ءِ سر ءَ ڈرون اُرش گرگینہ کوتل ءِ ھند سر ءَ کنگ بیتگ چریشی ءِ آسر ءَ پوج ءِ کارندھاں جانی تاوان چست کنگ کپتگ-
اِھوالکار ءِ رِد ءَ بُنجل ءِ سر ءَ ڈرون اُرش کنگ بیتگ واکدار ءَ تنی وھدے اے درگت ءَ ھچ وڑیں درشان شنگ نہ کتگ-
اشی ءَ ساری چیزے روچاں مستونگ ءُ کلات ءَ پاکستانی پوج ءِ بُنجل بلوچ لبریشن آرمی ءِ نیمگ ءَ چہ ڈرون اُرش کنگ بیتگ-
ھمے سال ءَ بلوچ لبریشن آرمی اولی بلوچ بُرزی یونٹ “قھر” ءِ جار جتگ- جارکش ءَ جیئند بلوچ ءَ درشان ءِ تہ ءَ گْوشتگ کہ گل ءِ جار ءَ جنت کہ گل ءِ نوکیں بُرزی ءُ ڈرون وارفیئر یونٹ ” قھر” (QAHR—Qazi Aero Hive Rangers) تچکی ءَ آپریشنل بیتگ ، ءُ آپریشن ھیروف دومی بھر ءِ میان ءَ وتی بنداتی آپریشنز ءَ گوں سوبمندی ءَ سرجم کتگ-
دیمتر ءَ گوشگ بیتگ کہ ڈرون ٹیکنالوجی ءِ کارمرز ءِ گل ناں تھنا دیر جنیں اُرش ءِ بودناکی داتگ بلکیں دُژمن ءِ گچین ءِ دمگاں تاں سر بیگ، آیانی چاروگی کنک ءُ آیاں نا اُمیتیں وھداں نشانگ کنگ ءِ تاکت داتگ-
جارکش ءَ گوشتگ کہ بی ایل اے سرپد بیت کہ نوکیں جنگ ءِ پڑ ءَ تھنا زمین ءِ سر ءَ اناں، بُرز ءُ سائبر اسپیس ءَ ھم دیم ءَ شتگ ءُ قھر اے پڑ ءَ گلی ساڑی بیگ ءِ بنداتی اِنت بلے جوانیں درشانے-
ھمے وڑ دالبندین ءَ مڈی ءِ پٹ ءُ پول ءَ دلگوش پرائیوٹ شرکت نیشنل ریسورسز لمیٹڈ ءِ یک سائٹے ءِ سر ءَ ناشناسیں سلاہ بندیں مردماں اُرش ءَ پد بیرانیانی ھال دیم ءَ اَتکگ-
دالبندین ءَ ھستیں پھد ھسپتال دالبندین ءَ برتگیں لاشانی رِد ءَ نُھ مردم مرتگ، کہ آیانی تہ ءَ یک درانڈیھی ءُ دو پھازوک ھم ھوار اَنت ءُ یک درانڈیھی آپیسرے ھم سلاہ بنداں دزگیر کتگ برتگ-
شرکت ءِ درشان ءِ رِد ءَ اے وئیل 22 اپریل 2026 ءِ بیگاہ کساس پنچ ءُ چل پنچ ملٹ سر ءَ چاگی ءِ دمگ داریگون ءَ بوتگ-
شرکت ءِ رِد ءَ اے وھد ءَ دمگ ءَ کلیئرنس ءُ لشکر کشی برجاہ دانکہ کارمند ءُ شوربندیاں پھازی ءِ دلجمی دات بہ کن ایں-
اے شرکت شال ءَ رجسٹرڈ ءُ پاتمہ پرٹیلائزر، لبرٹی ملز ءُ لکی سیمنٹ ءِ میان ءَ یک یکجاھی شوربندی ءِ ھساب ءَ جوڑ کنگ بیتگ-
شرکت ءِ ویب سائٹ ءِ رِد ءَ اشی ءِ گور ءَ بلوچستان ءَ کساس 500 مربع کلومیٹر ءِ دمگ سُھر ءُ پول ءِ شوھاز کنگ ءِ لائسنس ھست اِنت-
بلے تنی وھدے اے اُرشانی زمہ واری ھچ گل ءَ نہ زرتگ-