پاکستانی لشکر ءَ زالبول آوار جنگ ءَ پد ناشناسیں جاھے ءَ برتگ۔
ھالانی رد ءَ پاکستانی لشکر ءَ ھمے ماہ ءِ 14 اپریل ءَ بلوچستان ءِ دمگ کیچ ءِ ھند سنگ آباد ءَ یک لوگے ءِ سر ءَ اُرش کتگ ءُ تاج محمد ءِ زھگ 22 سالی گل بانک آوار جتگ ءُ گوں وت برتگ۔
لوگ ءِ مردم ءُ بی وائی سی ءَ ھال ءِ راست کتگ ءُ گشتگ کہ پاکستانی لشکر ءِ دست ءَ آئی ءِ دزگیر کنگ ءَ پد گل بانک انگت ءَ دیم ءَ آرگ نہ بیتگ ءُ کھول ءَ گوشتگ آئی ءِ زند ءِ درگت ءَ سکا ترس انت۔
زانگ بہ بیت کہ اے ماہ ءَ چہ بلوچستان ءَ پنچ بلوچ زالبول زورانسری بیگواہ کنگ بوتگ اَنت، وھدے کہ گوستگیں ماھانی تہ ءَ کساس 15 زالبول چہ بلوچستان ءِ جتاجتائیں دمگاں پاکستانی لشکر ءُ انٹیلی جنس ادارگاں زورانسری ءَ بیگواہ کتگ اَنت۔
اے سال ءِ اپریل ءَ چہ بلوچستان ءَ زورانسری بیگواہ کنگ بوتگیں مردمانی تہ ءَ خدیجہ بلوچ ھم ھوار اِنت کہ آ چہ شال ءَ بولان میڈیکل کالج ءِ ھاسٹل ءَ بیگواہ بوتگ؛ سمینہ دوست محمد کہ گوستگیں شپ ءَ چہ ھزدار ءَ بیگواہ بوتگ؛ چہ کراچی ءِ نیول کالونی ءَ بیگواہ آواران ءِ نندوک حسینہ بلوچ؛ نصیر ءِ لوگ بانک شکیلہ کہ 10 اپریل ءَ چہ کراچی ءَ بیگواہ بوتگ؛ ءُ تاج محمد ءِ چُک 22 سالی گل بانک کہ 14 اپریل ءَ بیگواہ بوتگ۔
گوستگیں سال ءَ چہ بلوچستان ءِ جتاجتائیں دمگاں بیگواہ کنگ بیتگیں چہ شال ءَ ماہ جبین، چہ ھب چوکی ءَ نسرینہ انگت بیگواہ اَنت؛ چہ حب ءُ خضدار ءَ پہ زور بیگواہ کنگ بوتگیں حیات بی بی، فاطمہ بلوچ، ءُ ھانی بلوچ یل کنگ بیتگ اَنت۔
ھمے وڑ چہ حب ءَ پاکستانی لشکر ءَ پہ زور بیگواہ کتگیں ثناء اللہ ءِ جنین ھاجرہ بلوچ ءُ چہ تربت ءَ محب اللہ ءِ چک روبینا بلوچ ءِ بابت ءَ دگہ ھچ وڑیں ھال ءُ اھوال نہ رس اِتگ۔
دیمترا دگہ دو جنین آدم کہ پاکستانی لشکر ءِ دست ءَ زوراکی ءَ بیگواہ کنگ بوتگ اَنت، فرزانہ زہری ءُ رحیمہ بی بی بلوچستان سرکار ءَ سلاہ بندیں گلانی آسراتی ءِ بھتام ءَ دزگیر کتگ اَنت۔