چہ کیچ ءَ سیادی داروکیں نرسنگ ءِ نودربر خدیجہ بنت پیر جان ءِ دزگیر کنگ ءُ بیگواہ کنگ ءِ سر ءَ کھول ءَ سکا دلپدردی درشان کتگ ۔
تربت پریس کلب ءَ پریس کانفرنس ءَ گوں تران کنان ءَ کھول ءَ گوشتگ کہ ھپتمی سیمسٹر ءِ بی ایس نرسنگ ءِ نودربر خدیجہ پیر جان 28 اپریل ءَ چہ آئی ءِ گڈی چکاسی انت 21 اپریل ءِ شپ ءَ شال ءَ بولان میڈیکل نرسنگ گرلز ہاسٹل ءَ بیڑ ءِ وھد ءَ آوار جنگ بیتگ۔
کھول ءِ گشگ ءِ رد ءَ اے کارروائی ءَ انسداد ناشرکاری ( سی ٹی ڈی) ءُ دگہ ادارگ ھوار بوتگ اَنت کہ آیاں نودربر بید ءِ سبب ءَ دزگیر کتگ ءُ ناشناسیں جاھے ءَ برتگ۔
کھول ءِ گشگ اِنت کہ دزگیر کنگ ءِ وھد ءَ آ ھم ٹارچر کنگ بوتگ کہ ایشی ءَ چہ ھاسٹل ءِ دگہ نودربراں ترس ءُ بیم تالان بوتگ۔
آیاں گوشتگ کہ خدیجہ پیر جان ءَ پیسر ءَ 14 مارچ 2026 ءَ سی ٹی ڈی ءِ تلب ءِ سر ءَ تربت ءَ پیش بوتگ، اود ءَ پٹ ءُ پول ءَ پد آ پلگار لیکگ بوتگ۔ کھول ءِ گشگ انت کہ اے گپ ءِ باوجود دوبر آوار جنگ وس ءَ در انت۔
کھول ءَ آئی ءِ سر ءَ سرکاری الزام رد کتگ ءُ بے بن لیک اِتگ اَنت۔ آہانی گشگ انت کہ خدیجہ ءَ گوستگیں وھد ءَ ءُ مرچیگیں وھد ءَ ھچ وڑیں ناجائزیں کارے ءَ ھوار نہ بوتگ۔
کھول ءَ گیشتر گوشتگ کہ خدیجہ ءِ انوگیں جاور ءُ ھال ءُ اھوال ءِ بابت ءَ آھاں ھچ وڑیں سرکاری ھال ءُ اھوال دیگ نہ بوتگ۔
آوار جنگ جتگیں مردم ءِ کھول ءَ لوٹ کتگ کہ خدیجہ پیر جان ءَ را زوت یل کنگ ءُ آمید گس ءَ پیش کنگ بہ بیت۔ آ گْوشتگ ا کہ اگاں آئی ءِ سر ءَ ھرچ وڑیں بھتامے ھست گڑا آئی ءَ را کانود ءِ رد ءَ انساپ ءِ ھک دیگ بہ بیت اگاں نہ آ یل کنگ بہ بیت۔
دومی نیمگ ءَ چہ گوستگیں روچ ءَ نودربر ءِ بیگواھی ءِ ھلاپ ءَ بی ایم سی ءِ نودربرانی زھرشانی دومی روچ ءَ ھم برجاہ انت-