پاکستانی لشکر ءَ یک جنینے ءُ مردینے زورانسری بیگواہ کتگ انت ۔
بلوچستان ءِ دمگ چہ ھزدار ءِ ھالانی رد ءَ گوستگیں شپ ءَ پاکستانی لشکر ءَ نال ءِ دمگ استخلی ءَ یک لوگے ءَ مانرتکگ ءُ لوگ ءِ مردم لٹ شاپ کتگ انت ءُ یک جنینے ءُ آئی ءِ ناکوزتک آوار جتگ اَنت۔
پاکستانی لشکر ءِ دست ءَ آوار جنگ بیتگیں زالبول ءِ سمینہ ء دوست مھمد جھمنند اورناچ ءِ نام ءَ زانگ بیتگ ءُ آئی ءِ ھمراھی ءَ آئی ءِ ناکوزتک قمبر ء لطیف ھم زورانسری ءَ بیگواہ کنگ بوتگ۔
کھول ءَ ھال راست کنان ءَ گْوشتگ کہ فورسز ءِ کارندہ شپ ءِ 9 بج ءَ آ چہ لوگ ءَ دزگیر کتگ ءُ ناشناسیں جاھے ءَ برتگ۔
زانگ بہ بیت گوستگیں چاریں روچانی تہ ءَ چہ بلوچستان ءُ کراچی ءَ سئے بلوچ زالبول زورانسری بیگواہ کنگ بیتگ اَنت کہ آیانی تہ ءَ میڈیکل ءِ نودربر خدیجہ بلوچ ھم ھوار اِنت کہ گوستگیں دو شپ ءَ پیش سی ٹی ڈی ءُ پاکستانی انٹیلی جنس ادارگانی دست ءَ شال ءَ چہ بولان میڈیکل کالج ءِ ھاسٹل ءَ بیگواہ کنگ بیتگ۔
ھمے وڑ ءَ چار روچ پیسر کراچی ءِ نیول کالونی ءَ بلوچ آبادی ءِ دمگ ءَ پاکستانی لشکر ءَ یک لوگے ءَ چھاپہ جتگ ءُ آواران ءِ نندوک حسینہ بلوچ زورانسری بیگواہ کتگ۔
خدیجہ بلوچ ءِ زوراکیں بیگواہ کنگ ءُ بولان میڈیکل کالج ءِ ھاسٹل ءِ سر ءَ چھاپہ جنگ ءِ ھلاپ ءَ شال ءَ نودربرانی نیمگ ءَ دھرنا انگت برجاہ اِنت۔
اے گپ یات کنگ بہ بیت گوستگیں چار ماھانی تہ ءَ بلوچستان ءَ جتاجتائیں دمگاں چہ درجنے ءِ کساس ءَ بلوچ زالبول زورانسری بیگواہ کنگ بیتگ اَنت۔ پد ءَ لھتے جنیں آدم دزگیری ءِ نام داتگ ءُ بھتام جنگ بیتگ انت کہ آ گوں بلوچ سلاھبندیں گلاں ھمگرنچ ءُ آسراتی دیگ ءَ اَنت، وھدے کہ بازیں جنین آدم انگت ءَ دیم ءَ آرگ نہ بیتگ اَنت۔
پاکستانی لشکر ءِ دست ءَ زورانسری ءَ بیگواہ کنگ بوتگیں زالبولانی تہ ءَ ماہ جبین بلوچ ھوار اِنت کہ 25 مئی 2025 ءَ چہ شال ءَ بیگواہ بوتگ، نسرین بلوچ 22 نومبر ءَ چہ حب چوکی ءَ بیگواہ بوتگ ءُ 20 دسمبر ءَ بیگواہ بوتگیں ھیر نساء ھم ھوار انت کہ انگت ءَ دیم ءَ آرگ نہ بیتگ اَنت۔
ھمے رنگ ءَ پاکستانی لشکر ءَ یکم دسمبر 2025 ءَ چہ ھزدار ءَ فرزانہ زہری نامیں جنینے زورانسری ءَ بیگواہ کتگ ات ءُ آ پد ءَ دیم ءَ آورتگ ات ءُ آئی ءِ سر ءَ سلاہ بندیں گلے ءِ گوں سیادی ءِ الزام جتگ ات وھدے کہ انوگیں وھد ءَ رحیمہ بی بی ھم زورانسری ءَ بیگواہ کنگ بوتگ ات۔ آئی ءَ را ھم بلوچ سلاہ بندیں گلانی آسراتی ءِ رد ءَ دیم ءَ آؤرتگ۔
گوستگیں ماھانی تہ ءَ چہ حب ءُ خضدار ءَ پاکستانی لشکر ءِ دست ءَ آوار جنگ بیتگیں فاطمہ ءُ حیات بی بی یل کنگ بیتگ انت۔