بلوچ یکجھتی کمیٹی ءَ بلوچستان ءِ جتاجتائیں دمگاں چار بلوچ ورنایانی محمد فرید بلوچ، محمد انور بلوچ، پزیر بلوچ ءُ کریم جان ءِ زورانسری آوار جنی ءَ پد آیانی لاش دزکپتگ اَنت وئیلاں یک تُرسناک گوشتگ کہ اے وئیل بلوچستان ءَ برجاہ درکانودی کاروائیاں ءُ انسانی ھکانی سنگین ھلاپ ورزیانی نوکیں منّانکے-
شش فروری 2026 ءَ چہ کلی صفر علی جنگل، دکی ءَ سیادی داروکیں بیست سالی ئیں محمد فرید بلوچ ءِ ٹپ ءُ ٹوریں لاش دزکپتگ- آ چار جون 2025 ءَ چہ لوگ ءَ زورانسری بیگواہ کتگ- کھول ءَ ھشت ماہ ءَ تاں آئی ءِ شوھاز برجاہ داشتگ، بلے واکدار نیمگ ءَ چہ ھچ وڑیں سرپدی دیگ نہ بیتگ-
بی وائی سی ءِ رِد ءَ فرید بلوچ کوش بلوچستان ءَ زورانسری آوار جنی ءُ درکانودی کوش برجاھیں درچ ءَ پیشدار اِیت-
ھمے وڑ ھمے دمگ چہ کلی صفر علی جنگل، دکی ءَ 44 سالی ئیں محمد انور بلوچ ھم چار جون 2025 ءِ نماز وانگ ءَ پد مسیت ءَ چہ ڈن ءَ آوار جتگ-
کساس ھپت ماہ ءَ پد چار جنوری 2026 آئی ءِ لاش چگل داتگ-
بی وائی سی ءِ گوشگ اِنت کہ انور بلوچ یک مھنت کنوکیں شھری یے بیتگ آئی ءِ کوش بلوچستان ءَ برجاہ ریاستی زوراکی ءِ درچ ءَ پیشدار اِیت-
وشبود پنجگور ءِ جھمنند 32 سالی ئیں بلوچ 25 نومبر 2025 ءَ ریاستی پلامرزی ٹولی ءَ آوار جتگ- دو ماہ ءَ پد ھپت فروری 2026 آئی ءِ ٹپ ءُ ٹوریں لاش وشبود ءَ چگل داتگ-
بی وائی سی ءِ رِد ءَ پزیر بلوچ جسم ءِ سر ءَ ٹپ ءُ ٹوریں نشان اے گپ ءِ نیمگ ءَ اشارہ کنت کہ آ آوار جنی ءِ میان ءَ درکانودی انسانی رویشگ نشانگ کتگ-
35 سالی ئیں ڈرائیور کریم جان، جھمنند تربت، 3 جنوری 2026 ءَ چہ اسٹار پلس مارکیٹ، تربت سادھیں پوشکانی تہ ءِ کارندھاں آوار جتگ-
کھول ءَ آیانی دزگیری یا ھند ءَ آوار جنی ءِ درگت ءَ ھچ وڑیں ھال دیگ نہ بیتگ- کساس یک ماھے ءَ پد فروری 2026 ءَ آئی ءِ ٹپ ءُ ٹوریں لاش بالگتر پنجگور ءَ دزکپتگ-
بی وائی سی ءِ رِد ءَ کریم جان یک لس شھری یے بیتگ ءُ آئی ءِ کوش بلوچستان ءَ آوار جنی ءَ پد کوش ءِ برجاھیں پالیسی ءِ تچکی منّانک اِنت-
بلوچ یکجھتی کمیٹی ءَ چاریں وئیلاں بلوچستان ءَ برجاہ انسانی ھکانی سنگین ءِ ھلاپ ورزیانی بھر گوشتگ کہ زورانسری آوار جنی، درکانودی آوار جنگ، لٹ ءُ کُٹ، ءُ درکانودی کوش یک مھکمیں پالیسی ءِ دروشم ءَ اتکگ، آیانی تہ ءَ لَس شھری، دھکنکار،مزدور ءُ ورنا درست سانمند بیتگ اَنت-
بی وائی سی ءِ رِد ءَ اے گامگیج میان استمانی انسانی ھکانی کانود، آرٹیکل 6 ءُ 9 (ICCPR) ءُ آرٹیکل 33 (چارمی جنیوا کنونشن ) تچکی ءَ ھلاپ ورزی اِنت-
بلوچ یکجھتی کمیٹی ءَ اکوام متھدہ ایمنسٹی انٹرنیشنل، ھیومن رائٹس واچ ءُ دگہ میان اُستمانی ادارھاں چہ لوٹ کتگ کہ آ بلوچستان ءَ زورانسری آوار جنی ءِ آزاتیں پٹ ءُ پول بہ کنائین اِیت- درکانودی کوش ءِ زمہ واراں جست بگپت- سانمنداں کھولاں انساپ دیگ ءَ کرد پیلو بہ کن اَنت-
بی وائی سی ءِ رِد ءَ میان استمانی بے تواری اے وئیلاں گیش کنت-