کراچی ءُ بلوچستان ءَ دگہ گیش چار مردم زورانسری آوار جنی ءِ نشانگ کنگ بیتگ اَنت

کراچی ءُ بلوچستان ءَ دگہ چار مردم زورانسری آوار جنی ءِ نشانگ کنگ بیتگ اَنت-

گیشیں ھالانی رِد ءَ کراچی ءِ دمگ فقیر کالونی ءِ جھمنند میر بالاچ ء غلام جان ھپت فروری 2026 ءَ چہ دبئی ءَ کراچی ءَ سر بیگ ءَ کراچی ایئرپورٹ ءَ ویز ءِ پٹ ءُ پول بھانگ ءَ آوار جتگ چریشی ءَ پد آ بیگواہ بیتگ-

کھول ءِ رِد ءَ میر بالاچ دبئی ءَ یک پورگارے ءَ بیتگ ءُ آروس ءِ کنگ ءِ ھاتر ءَ موکلانی واستا ڈیھ ءَ واتر آیگ ءَ بیتگ- کھول ءِ گوشگ اِنت کہ لھتے کلاکاں گوزگ ءَ پد آیاں ایئرپورٹ انتزامیہ ءَ چہ میر بالاچ ءِ درگت ءَ جُست ءُ پُرس کتگ گڑا واکداراں گوشتگ ما نزان ایں اے درگت ءَ-

کھول ءِ گوشگ اِنت کہ ھپت فروری 2026 ءَ پد میر بالاچ ءِ ھچ وڑیں ھال سر نہ بیتگ، چریشی ءِ سوب ءَ تُرس اِنت کہ آ زورانسری بیگواہ کتگ- کھول ءَ واکدار ءَ چہ زوت گامگیج زیرگ ءُ میر بالاچ ءِ یل کنائینگ لوٹ کتگ-

ھمے وڑ دو فروری ءَ مستونگ ءِ دمگ چہ لک پاس ءَ پاکستانی پوج ءَ داود لھڑی ء محمد اعظم لھڑی آوار جتگ ءُ ناشناسیں جاھے ءَ برتگ-

ھمے وڑ نُھ فروری ءَ شال ءِ دمگ چہ سریاب ءَ پاکستانی پوج ءَ شھروز بلوچ ء عبیداللہ آئی ءِ لوگ ءَ چہ آوار جتگ ءُ بیگواہ کتگ-

اشی ءَ ابید ھشت فروری ءَ چہ ھب چوکی ءَ جھاؤ ءِ جھمنند نادل علی ء خیر محمد پاکستانی پوج ءَ آوار کتگ ءُ بیگواہ کتگ-