اے مھکان ءُ ماہ گلزمین ءَ بہ موک
شائر: نِسار کاؔدر
دی بلوچستان پوسٹ
سلام ڈیھ ءِ پُل ءُ بھاراں سلام
سلام آجوئی نرمزاراں سلام
اے مھکان ءُ ماہ، گُلزمین ءَ بہ موک
وتی ننگ گُلیں ماجبین ءَ بہ موک
اے کنڈگ، اے کوہ ءُ ھساراں سلام
سلام آجوئی نرمزاراں سلام
مہ بیت نام ءُ بُندر نِشانے مہ بیت
پہ بدواہ ءَ کاپر ءُ بانے مہ بیت
اے جمبر، اے ھَور ءُ اے ھاراں سلام
سلام آجوئی نرمزاراں سلام
ھما کہ اے راھاں چراگاں مُش اَنت
ھمُک جوریں لبز ءُ جواباں گُش اَنت
سلام رُژن ءُ اسپر سگاراں سلام
سلام آجوئی نرمزاراں سلام
زِر ءَ ھون تلان اَنت منی ھمبلانی
کپن اوں بلان اَنت منی ھمبلانی
اے کوچگ اے دشت ءُ تلاراں سلام
سلام آجوئی نرمزاراں سلام
دل ءَ جزماں نام ءُ نِشانے بلیت
پہ جنگ ءَ گلیں تیرکمانے بلیت
سلام سبزکیں مئے کِشاراں سلام
سلام آجوئی نرمزاراں سلام
مہ نِند ات لوگ ءَ بہ بندے کتاراں
وتن جنگ ءَ سرگر برو سرمچاراں
سلام کُنگُریں شھسواراں سلام
سلام آجوئی نرمزاراں سلام
مہ نند ایمنی ءَ تو ھلک ءَ نسار ءِ
نہ رک ئے نوں جزماں چہ تلک ءَ نسار ءِ
سلام بام ءُ ھیروپ سھاراں سلام
سلام آجوئی نرمزاراں سلام