نوشکی : پاکستانی پوج لوگ لوگ ءَ بیڑبرگ ءَ اِنت، بی ایل اے سروک ءِ درگت ءَ جُست ءُ پُرس

پاکستانی پوج ءِ نیمگ ءَ چہ نوشکی ءِ جتاجتائیں دمگاں لشکر کشی تُرند کنگ بیتگ، کرفیو برجاہ-

چہ نوشکی ءَ ھالانی رِد ءَ پاکستانی پوج ءِ مزنیں کچے ءَ دمگ ءَ سر بیتگ اَنت ءُ شھریاں لوگ ءِ نندگ ءُ بازار بند کنگ ءِ پرمان دیگ بیتگ-

اے میان ءَ پوج ءِ ٹینک شھر ءِ جتاجتائیں ھنداں ساڑی اَنت-

ھالانی رِد ءَ شپ ءِ وھد ءَ پاکستانی پوج ءَ نوشکی ءِ احمد وال ءِ ھند ءَ درزنانی لوگانی سر ءَ بیڑ برتگ ءُ موناھل پون ءُ دگہ لوگی سامان پٹ ءُ پول کتگ اَنت-

پوج ءِ کارندھاں اے میان ءَ میتگ ءِ مردماں چہ بلوچ لبریشن آرمی ءِ سروک بشیر زیب بلوچ ءِ اوتاک ءِ درگت ءَ ھم جُست ءُ پُرس کتگ-

زانگ بہ بیت کہ نوشکی ءِ احمد وال بی ایل اے ءِ سروک بشیر زیب ءِ بُنکی ھنیک اِنت، آئی ءِ جند لوگ شورواں پٹ کتگ ءَ تراکاں چہ تباہ کتگ-

اے میان ءَ پاکستانی پوج ءَ نوشکی ءِ قاضی آباد ءَ ساڑی یک ھالیگ لوگے ھم شورو پٹ کتگ ءُ تراکینتگ، اے لوگ حاجی عبدالصمد نامیں مردمے ءِ بیتگ کہ 2009 ءَ یک وئیلے ءَ بیران بیتگ، وھدے کہ آئی ءِ کھول بازیں سالاں چہ ھالیجی ڈیھاں جھمنند اِنت-

زانگ بہ بیت 31 جنوری ءَ بلوچ لبریشن آرمی ءَ آپریشن ھیروف ءِ دومی بھرگ ء آ دگہ شھرانی وڑ ءَ نوشکی ھم دستیگ کتگ، اود ءَ آ شش روچ ءَ تاں وتی دستیگ برجاہ دارگ ءَ سوبمند بیتگ اَنت-

بی ایل اے ءِ شش روچ ءَ پد آپریشن ءِ ھلاس کنگ جار جنان ءَ اے میان ءَ آئی ءَ پاکستانی پوج ءِ بازیں بُنجل ءُ آئی ایس آئی ءِ ھیڈکوارٹر نشانگ کتگ، وھدے کہ شش روچ ءَ میڑاں درزنانی پاکستانی پوج کارندہ مرتگ اَنت-

بی ایل اے آپریشن ھیروف ءِ دومی بھرگ ءِ ھلاسی ءَ پد پاکستانی پوج مزنیں کچے ءَ کارندہ نوشکی ءَ آیگ برجاہ ءَ اِنت وھدے کہ بازیں مردمے دزگیر ءُ زورانسری آوار جنی ءِ ھال سر بیتگ-