پنجگور ءَ پوج ءِ گچینی کارندہ ءِ کوش، مستونگ ءَ زورگریں پوج ءِ نشانگ کنگ زمہ واری بی ایل اے ءَ منّ اِتگ انت

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ سرمچاراں پنجگور ءَ زورگریں پاکستانی پوج ءِ گچینی کارندہ زاھد محمد حسین یک اُرشے ءَ نشانگ کتگ ءُ کشتگ- مستونگ ءَ سرمچاراں زورگریں پاکستانی پوج ءِ کارندہ اُرش ءِ نشانگ کتگ اَنت-

جارکش ءَ گْوشتگ کہ بلوچ لبریشن آرمی ءِ سرمچاراں یک جنوری ءِ شپ ءَ پنجگور ءِ دمگ کاٹاگری ءَ زورگریں پاکستانی پوج ءُ چیریں ادارھانی جوڑ کتگیں وتگڑیں ڈیتھ اسکواڈ ءِ ھاسیں کارندہ زاھد محمد حسین آئی ءِ اوتاک ءِ سر ءَ نشانگ کتگ کشتگ- سرمچاراں کارندہ ءِ سلاہ ھم دستیگ کتگ اَنت-

جارکش ءَ گوشتگ کہ زاھد زورگریں پاکستانی پوج ءِ سروکی ءَ بازیں وھدے بیت سلاہ بندیں ٹولی ءِ سروکی ءَ کنگ ءَ بیتگ کہ لوگانی دودمان ءِ لگتمالی، ورنایانی زورانسری آوار جنی ءَ زورگریں پوج ءِ کمکاری ءَ تچکی ھوار بیتگ- اے ٹولی زاھد ءِ سروکی ءَ پوجی زوراکیاں زورگریں پوج ءِ کمکاری ءَ ھوار پنجگور ءَ ورنایانی ٹارگٹ کلنگ ءَ ھوار بیتگ- اے ٹولی ءِ زورگریں پوج ءَ دمگ دُزی، ڈُنگی ءُ منشیات باپاری ءَ ھوار چاگردی سلّکاریاں بے لگام کتگ اَنت-

جارکش ءَ گوشتگ کہ بلوچ راج ءِ سر ءَ زوراکی ءُ راجی زرمبشت ءِ ھلاپ ءِ کار سر ءَ چاریگ زاھد حسین بلوچ لبریشن آرمی ءِ نشانگ لسٹ تہ ءَ بیتگ- سرمچاراں چاریگ کشتگ ءُ آ گُڈی آسر ءَ سر کتگ-

جارکش ءَ گوشتگ کہ بلوچ لبریشن آرمی ءِ سرمچاراں بیست ھشت دسمبر ءَ مستونگ ءِ دمگ اسپلنجی مَرو ءَ زورگریں پاکستانی پوج ءِ پیادگ کارندہ ھما وھدے ءَ یک اُرشے ءِ نشانگ کتگ وھدے آ دمگ ءَ پیشگامی ءِ جُھد کنگ ءَ بیتگ، اُرش ءَ زورگریں پوج ءَ جانی تاوان چست کنگ کپتگ وھدے کہ سرمچاراں زورگریں پوج ءِ یک کواڈ کاپٹرے جتگ ءُ دور داتگ-

جارکش ءَ گُڈی ءَ گوشتگ بلوچ لبریشن آرمی اے اُرشانی زمہ واری ءَ منّ اِیت- زورگریں پاکستانی پوج ءُ آئی ءِ شریدارانی سر ءَ مئے اُرش برجاہ بنت-