جنگ آماچیں بلوچستان ءَ نوکیں سال ءِ بندات
ٹی بی پی شونگال
بلوچستان ءَ ماہ ءُ سال گوزان انت بلے ناگیگیں جاورھال گھتر بوگ ءَ ابید سنگینیں جاورھال گیش بوان انت- دو ھزار ءُ بیست ءُ پنچ ءِ سال ءَ زورانسری بیگواھی،ریاستی زوراکی گیش بوتگ انت ءُ سیاسی باسکانی بندشی گیش بوتگ – پیپلز پاٹی ءِ واک ءِ سرکار، بلوچ سیاسی رھشونانی دزگیری ءُ بندیگ کنگ ءَ الکاپیں کانونی جواز ءِ پیش کنگ ءِ بے سوبی ءَ ابید بلوچستان ءِ آمیدگس رھشونانی یل دیگ ءَ بے واک انت-
نودربر، سیاسی باسک ءُ بلوچ جھد ءَ ھواریں مردمانی سیاد ءُ وارس زورانسری بیگواہ کنگ ءِ درچ برجاہ انت- ءُ بلوچستان ءَ نی زالبول ھم زورانسری بیگواھیانی درچ گیش بوتگ- دوھزار ءُ بیست ءُ پنچ ءَ دَہ ءَ گیش زالبول زورانسری بیگواھی ءِ آماچ کنگ بیتگ انت ءُ ھشت زالبول انگت ءَ زورانسری بیگواہ انت- بلوچستان ءَ ریاستی رِٹ شھری دمگ ءُ کنٹونمٹ ءَ داں ھست انت ءُ سرکار بلوچستان ءَ وتی رٹ ءِ آرگ ءِ نام ءَ ریاستی زوراکیاں گیش کنگ انت ءُ چریشی ءِ نشانگ بلوچ زالبول بوگ ءَ انت-
زورھزار ءُ بیست ءُ پنچ کہ اود ءَ بلوچستان ءَ سیاسی جیڑھانی دیمپانی انت ھمود ءَ سرکار ءِ کچ ءُ کساسانی رد ءَ شھری، پولیس ءُ فرنٹئر پورس ءَ ھوار سیکیورٹی پورس ءِ سر ءَ اُرشانی ریکاڈاں گیشی اتکگ انت- وتکش اُرشاں، بمب تراکاں ءُ نشانگی اُرشاں پوج ءِ 202 آپسر ءُ کارندھاں ھوار 443 مردم جنگ بیتگ انت- جعفر ایکسپریس سروس ءِ واستا سال دوھزار ءُ بیست ءُ پنچ یک ناوشیں سالے بیتگ، چریشی ءَ یکشل ءَ بیوکیں بمب تراک، پھلانی تاوان ءُ 11 مارچ ءَ پشاور ءَ روکیں ٹرین ءِ ھائی جیک کنگ اے سال ءِ ھترناکیں اُرش بیتگ ءُ سال ءِ گڈی ماھاں نوکنڈی ءَ فرنٹیئر کور کیمپ ءِ سر ءَ اُرش ءَ بلوچستان ءَ چین ءُ بیرک گولڈ کمپنی ءِ کھنانی پریامانی سر ءَ ھم سکیں سان کپگ ءِ گمان انت-
دوھزار ءُ بیست ءُ پنچ ءِ سال ءَ سرجمیں بلوچستان ءَ آجوئی ءِ واستا پرکاریں سلاہ بندیں گل بلوچ لبریشن آرمی، بلوچستان لبریشن فرنٹ ءُ بلوچ ریپبلکن گارڈز ءِ اُرشانی توک ءَ گیشی اتکگ ءُ بازیں کچے ءَ اُرشانی توک ءَ ترندی ءِ برجاہ بیتگ-
دوھزار ءُ بیست ءُ شش ءَ بلوچستان ءِ سنگینیں جاورانی کمی آیگ ءِ رھبند ھچ گندگ ءَ آیگ ءَ نہ انت- دوھزار ءُ بیست ءُ پنچ ءِ آسری ءَ بلوچستان ءَ گرینڈ الائنس ءِ ملازماں کلم یل دیگ ءِ ھرتال برجاہ داشتگ – کیچ ءِ دمگ ءَ زورانسری زالبولانی یل دیگ ءِ ھاتر ءَ آیانی کھولاں سی پیک دگ ءِ سر ءَ نندانک داتگ ءُ ریاستی زوراکیانی ھلاپ ءَ سیاسی جد ءُ جھد ھم برجاہ انت – بلوچ سلاہ بندانی اُرشانی گیشی ریاستی لوٹاں تاوان بوگ ءَ انت، اے سنگینیں جاوراں سبزاوگیں بلوچستان ءَ جنگ آماچیں آسری کنگ مشکل نہ انت نوکیں سال ءَ ھم بلوچستان ءِ جاور رودم زیران کن انت-