جنازہ ءِ نماز ءَ مزنیں کساسے ءَ مردماں چہ جتا جتائیں سیاسی، چاگردی ءُ جتا جتائیں تکاں بندوکیں مھلوک ھوار بوتگ اَنت۔
بلوچستان ءِ دمگ دالبندین ءَ پاکستانی لشکر ءِ تیرگواری ءَ بیران بوتگیں سیاسی جھدکار ءُ وکیل زبیر بلوچ ءِ جنازہ ءِ نماز مرچی مستونگ ءَ وانگ بوتگ۔
زبیر بلوچ بنکی ھنکین مستونگ ءَ گلزمین ءِ میار کنگ بوتگ کہ اود ءَ بلوچ اسٹوڈنٹ آرگنائزیشن ءَ ھوار جتا جتائیں دیمروئی پسندیں سیاسی گلانی سروک، سول سوسائٹی ءِ نمائندگ، ادیب، دانشور ءُ دگہ تکاں بندوکیں سیادی داروکیں مردماں بھر زرتگ۔
زبیر بلوچ ءِ سیادی مستونگ ءَ بوتگ۔ آ ءُ آئی ءِ ھمراہ نثار بلوچ گوستگیں روچ ءَ دالبندین ءَ پاکستانی لشکر ءِ نیمگ ءَ نندوکیں لوگے ءِ سر ءَ چھاپہ ءِ وھد ءَ بیران بیتگ اَنت ۔
بلوچستان ءِ سیاسی، چاگردی ءُ انسانی ھکانی گلاں زبیر بلوچ ءِ کوش سک ایر جتگ ءُ گْوشتگ کہ ریاست بلوچستان ءَ زور ءِ تک ءَ تواراں ایرموش کنگ ءِ جُھد ءَ اِنت۔
زبیر بلوچ وکیلے ھم بوتگ، بلوچستان بار کونسل ءَ اے وئیل ءِ ھلاپ ءَ پنچ روچ ءَ آمید گس ءِ بائیکاٹ ءِ جار جتگ، وھدیکہ بی ایس او ءَ وتی پیسریگیں چیئرمین ءَ را ”شھید ڈگار“ ءِ لقب داتگ۔